Nýjustu fréttir

Flugeldasala Knattspyrnudeildarinnar hefur opnað á Íþróttavellinum (Selinu). Deildin býður upp á gríðarlega gott úrval afbragðsflugelda á hagstæðu verði. Seldir eru allar tegundir fjölskyldupakkninga, skottertur, innibombur og allt sem nöfnum tjáir að nefna. Við stjórnvöl flugeldasölunnar eru reynsluboltar í flugeldaheiminum sem veita góð og fagleg ráð um allt sem viðkemur flugeldunum.

Þær stöllur Thelma Sif Kristjánsdóttir og Veronika Ómarsdóttir voru valdar til að taka þátt í úrtaksæfingum KSÍ með U-17 landsliði kvenna. Sannarlega frábært og sýnir að kvennaknattspyrnan er í mikilli sókn hér á Selfossi. Til hamingju stelpur!

Örn Davíðsson frjálsíþróttamaður var valinn íþróttamaður Árborgar 2006 og Bergþóra Kristín Ingvarsdóttir fimleikakona var valin íþróttakona Árborgar 2006. Umf. Selfoss óskar þeim innilega til hamingju með viðurkenninguna sem og öllum þeim sem tilnefndir voru.

Í dag lék u-88 lið Íslands tvo leiki, gegn Pólverjum og Svisslendingum og unnust þeir báðir.

Í dag lék u-88 lið Íslands gegn Þjóðverjum á Hela Cup í Þýskalandi. Með þessu liði leika tveir Selfyssingar, Helgi Héðinsson og Hörður Másson.

Hin árlega uppskeruhátíð Íþrótta- og tómstundanefndar Árborgar verður haldin í Iðu á fimmtud. 28. des kl. 20:00. Þar verða afhentir styrkir úr verkefnasjóði Íþrótta- og tómstundanefndar, Afreks- og styrktarsjóði Árborgar og tilkynnt um kjör íþróttakonu og íþróttakarls Árborgar 2006. Meistarahópur fimleikadeildarinnar Umf. Selfoss kemur fram.
Frjálsíþróttadeild Umf. Selfoss sér um kaffiveitingar.

Auk þeirra Ragnars, Einar og Guðmundar Árna sem voru valdir til æfinga með U-16 landsliði Íslands, þá var Helgi Héðinsson einnig valin til þátttöku í verkefni með U-18 landsliðinu sem er að fara á mót á milli jóla og nýárs.
Þessu til viðbótar hefur Hörður (Sjóli) Másson frá Dalbæ einnig verið kallaður til æfinga með U-18 liðinu og fer hann einnig út með þeim á milli jóla og nýárs. Þetta er í fyrsta skipti sem hann er valin í landslið. Til hamingju Hörður með verðskuldaðan árangur alls erfiðisins.

Dregið var í 8 liða úrslit í bikarnum í yngri flokkunum á miðvikudaginn var og enn einu sinni elti ólánið Selfossi. Öll liðin sem enn eru í keppninni fengu leik á útivelli. Í síðustu umferð spiluðu lið Selfoss alls 5 leiki af 6 á útivelli. Í pottinum að þessu sinni voru lið 4. fl. A kk, 3. fl. 90, 3. fl. 89 og 2. flokks. 

Dregið var í happdrætti unglingaráðs knattspyrnudeildar 21. desember. Eftirfarandi hlutu vinning:

Nú eru komin drög að niðurröðun fyrir Deildarbikarkeppni KSÍ 2007. Við verðum í riðli með Víði, ÍH, Gróttu, ÍR og Njarðvík. ÍH og ÍR munu leika gegn okkur í 2. deildinni í sumar en Víðir og Grótta leika í 3.deild. Njarðvíkingar unnu sér þátttökurétt til að leika í 1.deild síðastliðið sumar. Hér er svo niðurröðunin með fyrirvara um breytingar:

Síðustu helgi spilaði 2. flokkur tvo leiki í Íslandsmótinu og Selfoss 89 í bikarnum í 3. flokki á móti IBV í Vestmannaeyjum. Ferðin byrjaði með því að við mættum á Bakkaflugvöll kl. 14.00 en þá tók við 3 klst. bið eftir flugi og síðan þegar flugi var aflýst kl. 17.00. Þá tók við bílferð til Þorlákshafnar og loks til Eyja með Herjólfi. Til Eyja vorum við komnir um 23.00 og var farið beint í háttinn enda vakið 06.00 daginn eftir því að fyrsti leikur var kl. 08.30 í 2. flokki, síðan 3. flokkur kl. 11.00 í Bikarnum og loks aftur 2. flokkur kl. 13.30. Sem sagt frekar stíf dagskrá þann daginn.   

Tveir strákar úr Umf. Selfoss þeir Ragnar Jóhannsson og Einar Héðinsson æfa nú af fullum krafti með U-17 ára landsliði Íslands í handknattleik. Guðmundur Árni Ólafsson var einnig valin í hópinn en átti ekki heimagengt þar sem hann er staddur á Kúbu í góðu yfirlæti í frí með fjölskyldunni. Á myndinni er landliðshópurinn samankomin eftir eina æfinguna.

Allir yngriflokkar Hamars/Selfoss verða komnir í jólafrí miðvikudaginn 20. desember. Við byrjum svo aftur eins og hér segir:
7.-9. flokkar karla byrjar miðvikud. 3. jan kl. 20:00,
7.-9. flokkar kvenna byrjar fimmtud. 4. jan kl. 17:00-18:00.
Minni-bolti yngri og eldri byrja sunnudag. 7. jan kl. 12:00.

Helgi Héðinsson 18 ára Selfosshnokki var á dögunum valinn í 16 manna hóp U-19 ára landsliðs karla sem fer á Hela Cup í Þýskalandi milli jóla og nýárs. Fyrsta æfingin hjá liðinu verður á þriðjudaginn kl. 08:00 í Víkinni.

Mikil fagnaðarlæti bárust frá Tíbrá, félagsheimili Ungmennafélagsins á laugardagsmorgun. Þar var piltur að skrifa undir samning við Selfoss sem hefur glatt áhorfendur í gegnum tíðina með knattleikni og glæsilegum mörkum. Það er óþarfi að kynna Sævar Þór Gíslason fyrir stuðningsmönnum okkar en hann gerði hér garðinn frægan seint á síðustu öld.

Selfyssingurinn Þórir Hergeirsson varð um helgina Evrópumeistari í handknattleik. Þórir er aðstoðarþjálfari norska kvennalandsliðsins í handknattleik og hefur verið búsettur og þjálfað í Noregi undanfarin 20 ár en áður þjálfaði hann yngri flokka Selfoss.

4. flokkur karla lék fjóra leiki um helgina. Á laugardag sigraði A liðið Valsmenn 24-19 og Selfoss B2 vann Aftureldingu 26-12. Á sunnudag lék B2-liðið við A-lið HK og lauk leiknum með sigri HK manna 26-31. B-liðið lék svo við á eftir við HK b og vannst sá leikur örugglega 31-12.

Hamar/Selfoss vann góðan útisigur á Fjölni í Gravarvoginum á föstudagskvöldið 83-88. Staðan eftir fyrsta leikhluta var 24-20, 44-39 í hálfleik og 60-55 eftir þriðja leikhluta. Byrd skoraði flest stig okkar manna eða 34 og tók 17 fráköst, Friðrik var með 21 stig, og Bojoviv skoraði 14 stig og tók 11 fráköst. Hallgrímur gerði 7, Lárus 6 og Svavar 6.

Þá er komið að því. Langþráð stund er í vændum hjá okkur stuðningsmönnum Selfoss. Leikmaðurinn sem beðið hefur verið eftir mun skrifa undir samning við félagið á morgun. Athöfnin verður í Tíbrá, félagsheimili Ungmennafélgasins kl.11:00. Við hvetjum fólk til að mæta og nota tækifærið og Tippa í leiðinni.

Selfoss tekur þátt í Íslandsmótinu í knattspyrnu innanhúss laugardaginn  16. des þegar 2. flokkur kvenna keppir í Garðinum. Fjögur lið eru í C-riðli, auk Selfoss eru það Afturelding, GRV (Grindavík/Reynir/Víðir) og ÍR. Mótið stendur frá kl. 10-13.

Þeir félagar Magnús, Gunnar og Birgir stóðu sig vel á jólamóti Júdófélags Reykjavíkur sem haldið var um síðustu helgi. Gunnar hlaut gull í sínum flokki, Birgir brons og Magnús sem var að keppa á sínu fyrsta móti stóð sig mjög vel.

Um helgina leika öll þrjú 4. flokks liðin okkar hér á Selfossi, alls fjóra leiki. Leikirnir fara fram á laugardag og sunnudag.

B1 liðið í 4. flokki karla vann góðan sigur á HK í Kópavoginn í gær. Eftir erfiðan fyrri hálfleik var staðan 13-10 fyrir okkar menn. Í seinni hálfleik bættu okkar menn í og unnu örugglega 31-20.

Um helgina fóru strákarnir í handboltaakademíunni á Selfossi í skemmtilega óvissuferð. Eins og sannri óvissuferð sæmir vissu strákarnir ekkert hvað til stóð þegar lagt var af stað. Þeir héldu að það ætti að vera vídeóæfing í rútunni. Farið var frá Selfossi niður á Eyrarbakka og til baka og síðan Gaulverjabæjarhringurinn sem endaði svo á jólahlaðborði á Rauða húsinu.

Leiknum sem átti að spila á fimmtudaginn kemur hefur verið frestað að beiðni Víkings fram yfir áramót. Þar með er Selfoss 90 komið í jólafrí og spila strákarnir ekki aftur fyrr en 13. og 14. janúar en þá fara þeir norður og spila tvo leiki í sömu ferð, við Þór og KA. Liðið er í 3. sæti eftir 5 leiki, hafa unnið 4 og tapað 1, fyrir FH 31-34.

Hamar/Selfoss vann góðan sigur á Þór Þorlákshöfn á laugardaginn í Lýsingarbikarnum í 16 liða úrslitum. Leikurinn endaði 78-64 eftir að staðan í hálfleik hafði verið 40-29.

Viðar Örn Kjartansson var valinn til að taka þátt í úrtaksæfingum vegna U17 liðs KSÍ en æfingarnar fara fram undir stjórn Lúkasar Kostic þjálfara U17 landsliðs Íslands. Æfingarnar fara fram á Akranesi og í Egilshöll 16. og 17. desember. Viðar Örn virðist vera að festa sig í sessi í þessum hópi og erum við öll mjög stolt af því.

Á jólasýningu fimleikadeildar var fimleikakona ársins kynnt. Hún er fyrir árið 2006 Bergþóra Kristín Ingvarsdóttir. Hún varð m.a. Íslandsmeistari í 6. þrepi sem eru frjálsar æfingar í almennum fimleikum.

Jólasýningar fimleikadeildar tókust með eindæmum vel og var húsfyllir á báðum sýningunum í íþróttahúsi Vallaskóla. Þema sýningarinnar "Þegar Trölli stal jólunum" naut sýn vel og var gaman að sjá fallega skreyttan salinn sem myndaði sannkallaða jólastemningu.

Öll þrjú 4. flokks liðin léku um helgina. A og B2 léku hér á Selfossi á laugardagin, A-liðið gegn FH og B2-liðið gegn Fram. B1-liðið lék í gær við Val í Reykjavík.

Þrír Selfyssingar hafa verið valdir í unglingalandslið Íslands skipaða leikmönnum fæddum 1990 og síðar. Þetta eru örvhenta skyttan Ragnar Jóhannsson, línumaðurinn Einar Héðinsson og örvhenti hornamaðurinn Guðmundur Árni Ólafsson. Þeir munu æfa stíft um jólin og eftir áramótin. Piltarnir fara væntanlega á móti í Noregi um miðjan maí á næsta ári og á Hela-cup í Þýskalandi um jólin 2007.

Jæja, þá er stórleiknum lokið. Selfoss 90 vann Selfoss 89 31:29 í hörku skemmtilegum leik fyrir framan tæplega 200 áhorfendur. Leikurinn bauð upp á allt sem skemmtilegir leikir eiga að gera, hraða, spennu, mistök, dramatík, góðar leikfléttur og frábær einstaklingstilþrif. Það er ekki annað hægt en að vera stoltur yfir því að Selfoss eigi tvö jafn góð lið og raun ber vitni í 3. flokki karla.

2. flokkur gerði góða ferð í Grafarvoginn í gærkvöldi og sigraði sterkt lið Fjölnis 37-39 eftir framlengingu í æsispennandi leik. Staðan í lok venjulegs leiktíma var 32-32. Sigurinn kom í síðari hluta framlengingar eftir mikla baráttu.

Í kvöld unnu strákarnir í A liði 4. flokks lið Stjörnunnar 23-19 í bikarnum. Leikurinn var liður í 16 liða úrslitum og eru þeir því komnir áfram í 8 liða úrslit.

Jólasýning fimleikadeildar verður nk. laugardag 9. des í íþróttahúsinu við Vallaskóla. Tvær sýningar verða, sú fyrri kl. 10:30-11:30 og sú síðari 12:30-13:30. Þema sýningarinnar er “Þegar Trölli stal jólunum”. Allir iðkendur deildarinnar tæplega 300 börn taka þátt í sýningunni. Að lokinni fyrri sýningunni verður Fimleikamaður ársins heiðraður. Aðgangur er ókeypis.

Dagana 2. og 3. desember s.l. spiluðu stelpurnar í 4. flokki tvo leiki. Fyrri daginn fengu þær KR í heimsókn og unnu 25-19.  Seinni daginn léku þær við Gróttu á útivelli og endaði leikurinn 23-14 fyrir Gróttu. 

Á fimmtudagskvöldið n.k. verður spilaður leikur í Vallaskóla sem á sér ekki hliðstæðu í íslenskum handknattleik. Þá munu lið Selfoss og Selfoss 2 spila gegn hvort öðru í 1. deild á Íslandsmótinu í 3. flokki. Þetta er í fyrsta skipti svo vitað sé að tvö lið frá sama félagi mætist í efstu deild á Íslandsmóti í nokkurri boltaíþrótt.

Strákarnir í  A-liði 4. flokks töpuðu í dag gegn Fram í miklum hörkuleik. Fram hefur hingað til haft besta liðið í þessum flokki. Jafnt var á flestum tölum í fyrri hálfleik, en Framarar skoruðu 3 síðustu mörk fyrri hálfleiks og höfðu yfir 12-14.

4. flokkur vann ÍR í keppni B-liða í dag. Í hálfleik var staðan 16-3 og lokatölur urðu 31-6. Sem sagt einstefna allan leikinn þar sem yfirburðir Selfoss voru algjörir í leiknum. Ekki er hægt að hrósa neinum einum leikmanni sérstaklega fyrir sína frammistöðu. Liðið í heild lék vel og agað og hafði þolinmæði að leiðarljósi í varnarleiknum.

Í dag lék 90 liðið í 3. flokki gegn Gróttu og vann þar yfirburðar sigur, 36-19 eftir að staðan hafi verið 21-8 í hálfleik. Einar Héðinsson, Guðmundur Árni, Örn Davíðsson og Ástgeir markmaður áttu allir skínandi leik en hafa ber þó í huga að mótspyrnan var ákaflega lítil í þessum leik.

Haukar 2 komu í heimsókn á föstudagskvöldið og léku gegn mfl. Selfoss. Haukar unnu okkar menn fyrr í haust í vægast skelfilegum leik. Leikurinn var í járnum framan af og höfðu gestirnir yfir í hálfleik 13-15. Lokatölur urðu 33-28 og því má segja að okkar strákar hafi náð fram hefndum frá því í haust.

Opið er í tippstofu Umf. Selfoss í Tíbrá alla laugardaga frá kl. 11 – 13. Að sjálfsögðu er kaffi á könnunni og bakkelsi í boði Guðnabakarís. Nú ríður á að drífa tipphópinn í Tíbrá á laugardagsmorgnum, spá í seðilinn og taka létta þjóðfélagsumræðu í góðra vina hópi í lok viku.

Við viljum hvetja fólk til þess að koma og hvetja strákana í Selfoss1 á morgun laugardag kl. 15.00 í Vallaskóla þegar þeir spila á móti Gróttu í 1. deild 3. flokks.

Í gærkvöldi tók Selfoss2 á móti Haukum í 1 deild 3. fl. karla. Haukar sem eru með eitt sterkasta lið landsins í þessum flokki byrjuðu Íslandsmótið mjög vel og höfðu aðeins tapað einum leik. Okkar strákar unnu síðasta leik eftir mjög erfiða byrjun og voru staðráðnir í því að halda áfram þar sem frá var horfið.