Frálsíþróttir

Íslandsmótið í fjölþrautum fór fram í Frjálsíþróttahöllinni í Laugardalnum 14.-15. febrúar síðastliðinn. Frjálsíþróttadeild Umf. Selfoss sendi þrjár stúlkur til leiks sem allar stóðu sig frábærlega vel. Ágústa Tryggvadóttir varð hlutskörpust kvenna í greinunum fimm og varð Íslandsmeistari. Hún bætti sinn fyrri árangur um 253 stig er hún náði 3809 stigum og setti um leið glæsilegt HSK og Selfossmet. Fjóla Signý Hannesdóttir keppti við Ágústu í kvennaflokki og varð í öðru sæti. Franziska Jóney Pálsdóttir, 14 ára, keppti í meyjaflokki. Þetta var hennar fyrsta þraut og uppskar hún 2540 stig sem er Selfossmet í meyjaflokki.

Meistaramót Íslands í frjálsum íþróttum var haldið helgina 7.-8. febrúar í Frjálsíþróttahöllinni í Reykjavík. Umf. Selfoss sendi  7 keppendur til leiks og stóðu þeir sig framúrskarandi vel. Afrakstur helgarinnar voru 6 verðlaun, 2 HSK-met og 7 persónuleg met. Lið Selfoss varð í 3. sæti í stigakeppni kvenna og í 6. sæti í heildarstigakeppni mótsins.

Síðastliðna helgi fór fram Meistaramót Íslands í unglingaflokkum. HSK og Selfoss sendu þangað vaskar sveitir  sem stóðu sig með ágætum. Keppendur voru 13 frá HSK og 7 frá Selfossi en Selfoss keppir undir eigin merki.  Alls unnu HSK og Selfoss 5 gull, 1 silfur og 5 brons. Í heildina varð Selfoss í 8. sæti með 48 stig og HSK í 9. sæti með 41 stig. Í einstökum flokkum voru Selfoss-ungkonur sterkar og urðu í 2. sæti í stigakeppninni.