Frálsíþróttir

Silfurleikar ÍR fóru fram laugardaginn 17. nóvember í Laugardalshöllinni. Á mótinu var keppt í flokkum 16 ára og yngri í fjölda greina og var metþátttaka á mótinu, um 470 keppendur tóku þátt í mótinu. Fjögur íslandsmet féllu á mótinu í flokki 11-12 ára stelpna og eitt í flokki 13-14 ára stelpna. Frjálsíþróttadeild Umf. Selfoss fór með 20 krakka 14 ára og yngri á mótið og stóðu þau sig alveg frábærlega.

Í flokki 8 ára og yngri var keppt í 60 m, hlaupi, langstökki og 400 m hlaupi og þar vorum við frekar fámenn en allir sigurvegarar sem tóku þátt, efnilegir krakkar á ferðinni.

Í flokki 9-10 ára var keppt í 60m,  600 m, langstökki og kúluvarpi. 9 ára strákarnir okkar stóðu sig mjög vel og voru framarlega í öllum greinum. Bjarki R. Bjarnarson varð 3. í 60 m. hlaupi af sínum jafnöldrum og 2. í langstökki, Teitur Örn Einarsson varð 3. í kúluvarpi og mjög framarlega í 600 m. 10 ára krakkarnir stóðu sig líka frábærlega.  Ástrós Hilmarsdóttir varð 2. af sínum jafnöldrum í 600 m. hlaupi og 2. í kúluvarpi.

Í flokki 11-12 ára var keppt 60m, 800m, kúluvarpi, hástökki og þrístökki. Þar eigum við glæsilegan hóp krakka. Stór hópur er búin að æfa lengi og aðrir eru nýbyrjaðir og voru að keppa á sínu 1. móti. 11 ára stelpurnar voru að stórbæta sig í mörgum greinum og af sínum jafnöldrum varð Sólveig Helga Guðjónsdóttir 3. í 60m hlaupi og 1. í kúluvarpi. Thelma Björk Einarsdóttir varð 3. í hástökki og Birna Sigurlaugsdóttir varð 3. í kúluvarpi.

Í flokki 13-14 ára var keppt í 6 greinum og þar áttum við aðeins einn keppanda sem stóð sig heldur betur vel og stórbætti sig í mörgum greinum. Franziska Jóney Pálsdóttir varð af sínum jafnöldrum 1. í kúluvarpi, 1. í hástökki, 3. í 200m hlaupi og 2. í 800m hlaupi.

Þetta var frábær árangur hjá krökkunum á mótinu og spennandi að fara á næsta mót í frjálsíþróttahöllinni um miðjan janúar. Öll nánari úrslit af mótinu eru inni á heimasíðu FRÍ, www.fri.is, undir mótaforrit.