Frálsíþróttir

Sumarmót Umf. Selfoss í frjálsum fyrir 11 ára og yngri fór fram í Þorlákshöfn fimmtudaginn 12. ágúst. Iðkendur frjálsíþróttadeildar Umf. Selfoss, sem koma víðs vegar af Suðurlandi, mættu fíldjarfir til leiks ásamt nokkrum krökkum frá Þorlákshöfn enda var mótið opið öllum. Mótið var það síðasta í sumar hjá þessum aldursflokkum og ríkti góð stemming á meðal keppenda. Rúmlega 20 krakkar mættu til leiks og stóðu sig með mikilli prýði.

Keppnisgreinar voru 60 m spretthlaup, langstökk, boltakast og 400 m hlaup. Allir keppendur fengu að móti loknu viðurkenningaskjal þar sem árangur þeirra í hverri grein kom fram. Grillaðar voru pylsur í keppendur og foreldra sem runnu ljúflega niður ásamt drykkjum. Frjálsíþróttadeildin þakkar kærlega öllum þeim fyrirtækjum sem styrktu okkur fyrir mótið, en það voru: SS Hvolsvelli, Hverabakarí Hveragerði, Guðnabakarí Selfossi, Bónus Selfossi og MS Selfossi.