Frálsíþróttir

Örn Davíðsson, 17 ára, varð Íslandsmeistari í kúluvarpi í drengjaflokki er hann varpaði kúlunni 14,05 m sem er HSK met, gamla metið átti Árni Arason og var það 13,98 m.  Örn var að ganga í drengjaflokkinn nú um áramót og var þetta hans fyrsta keppni með 5,5 kg kúlu og er því ljóst að hann á eftir að bæta metið enn frekar á næstu mótum.   Örn lenti í hörkueinvígi í hástökki og endaði í 2. sæti með 1.87 m og í 60 m hlaupi bætti hann sinn besta tíma úr 7,99 s í 7,90 s.
Dröfn Hilmarsdóttir, 18 ára, nældi sér í þrenn bronsverðlaun um helgina. Hún stórbætti sig er hún kom þriðja í mark í  60 m grindahlaupi er hún hljóp á tímanum 9,98 sek en hún átti best 10,37 s. Í langstökki bætti hún sig um 28 cm er hún stökk 4,86 m og fékk bronsverðlaun. Í kúluvarpi þeytti hún kúlunni til bronsverðlauna, 9,78 m. Hún stórbætti sig síðan í þrístökki þegar hún stökk 10,55 m og var aðeins 1cm frá bronsverðlaunum.
Önnur 18 ára stúlka, Fjóla Signý Hannesdóttir, var líka í stuði um helgina.  Fjóla Signý varð í öðru sæti í 60 m grindahlaupi þegar hún hljóp á tímanum 9,79 s og bætti sig um 1 brot.  Hún bætti sig um 8 cm í þrístökki er hún fékk silfurverðlaun fyrir að stökkva 10,65 m.  Fjóla Signý bætti sig síðan um 18 cm í kúluvarpi með 9,27 cm kasti. 
Andrea Ýr Bragadóttir, 18 ára, hljóp til silfurverðlauna í 60 m hlaupi á tímanum 8,30 s. Andrea Ýr, Edda Þorvaldsdóttir, Þórhildur Helga Guðjónsdóttir og Fjóla Signý Hannesdóttir hlupu til silfurverðlauna í 4x200m boðhlaupi á tímanum 1.51,99 m og voru rétt á efir sigursveit ÍR-inga sem settu Íslandsmet í boðhlaupinu.
Þórhildur Helga Guðjónsdóttir, 15 ára bætti sinn besta árangur í 60 m hlaupi úr 8,39 s í 8,36 s og varð í 4. sæti. Með þessum árangri náði Þórhildur Helga tilskyldu lágmarki í Úrvalshóps FRÍ sem er skipaður bestu unglingum á landinu. Þórhildur Helga stórbætti sig í 200m hlaupi, hún hljóp á tímanum 27,88 s en átti best áður 28,38 s og að lokum stökk hún 9,41 m í þrístökki sem er bæting um 67 cm hjá henni.
Edda Þorvaldsdóttir, 18 ára, bætti sig um 1 brot í 60 m hlaupi og 200 m hlaupi, hljóp 60 m á timanum 8,65 s og 200 m á 28,59 s.
Gréta Sigrún Pálsdóttir, 18 ára, bætti besta árangur sinn í langstökki um 11 cm með 4,76 m löngu stökki.
Áslaug Ýr Bragadóttir, 15 ára, bætti sinn besta árangur í kúluvarpi um 72 cm þegar hún kastaði kúlunni 9,32 m.
Að lokum bætti Eyrún Halla Haraldsdóttir, 17 ára, bætti sig um 24 cm í kúluvarpi með 8,45 m löngu kasti.

Frábær árangur hjá frjálsíþróttadeild Umf. Selfoss. Næsta verkefni deildarinnar er Héraðsmót HSK sem haldið verður á Hvolsvelli á föstudaginn.