Frálsíþróttir

Glæsilegur árangur og 4 met slegin á Grunnskólamóti Árborgar í frjálsum íþróttum

176 keppendur í 1.-10. bekk frá Vallaskóla og Sunnulækjarskóla tóku þátt í Grunnskólamóti Árborgar sem haldið var í Iðu í þann 8. mars. Keppni var hörkuspennandi og gaman að sjá hvað mörg börn tóku þátt. Glæsilegur árangur náðist í mörgum greinum og voru 4 Grunnskólamet slegin á mótinu og eitt met var jafnað.

Diljá Böðvarsdóttir Vallaskóla sló 2 ára gamalt met Andreu Lindar Guðmundsdóttur er hún stökk 1.67 m og bætti gamla metið í flokki 1.-2. bekkjar um 3 cm. Daldís Perla Magnúsdóttir Vallaskóla sló met í kúluvarpi í 5.-6. bekk er hún kastaði kúlunni 8.60 m og bætti ársgamalt met Kristrúnar Steinþórsdóttur um 12 cm. Kristrún Steinþórsdóttir Vallaskóla bætti kúluvarpsmetið í 7.-8. bekk um 1 cm þegar hún kastaði kúlunni 8.92 m, eldra metið átti Dagný Hanna Hróbjartsdóttir. Þórhildur Helga Guðjónsdóttir Vallaskóla bætti met Fjólu Signýjar Hannesdóttur um 4 cm í langstökki þegar hún stökk 2.50 m í flokki 9.-10. bekkjar og Ástrós Hilmarsdóttir Vallaskóla jafnaði langstökksmetið í flokki 3.-4. bekkjar þegar hún stökk 1.82 m.

Í 1.-4.bekk fengu allir keppendur jafna viðurkenningu en í 5.-10. bekk voru Grunnskólameistarar krýndir. Fjórir krakkar náðu þeim glæsilega árangri að verða Grunnskólameistarar í tveimur greinum, það voru þau Thelma Björk Einarsdóttir, Kristrún Steinþórsdóttir, Hermann Guðmundsson og Orri Davíðsson en þau eru öll nemendur í Vallaskóla.

Úrslit mótsins má sjá á heimasíðu Frjálsíþróttasambands Íslands www.fri.is undir liðnum mótaforrit.