Frálsíþróttir

Unglingamót HSK var haldið að Laugarvatni 27. og 28. júní. Umf. Selfoss hafði nokkra yfirburði á mótinu og sigraði með 263 stigum. Dímon komu næst með 176 stig.  Þórhildur Helga Guðjónsdóttir og Guðmundur Árni Ólafsson bæði frá Umf. Selfoss sigruðu allar sínar keppnisgreinar og voru stigahæst á mótinu.

Þórhildur Helga sigraði langstökk, þrístökk, 100 m, 400 m og 800 m hlaup og Guðmundur Árni sigraði langstökk, þrístökk, spjótkast, 100 m og 400 m hlaup. Þórhildur Helga hlaut að auki verðlaun fyrir besta afrek mótsins en hún hlaut 988 stig fyrir að hlaupa 100 m á 13.04 sek.  Þórhildur Helga sem er 15 ára var þarna að hlaupa á sínum besta tíma en vindur var aðeins yfir leyfilegum mörkum þannig að tíminn fæst ekki staðfestur. Þessi tími Þórhildar er mjög góður og er hún í mikilli framför og ljóst að hún á mikið inni í framtíðinni.

Fjóla Signý Hannesdóttir, 18 ára, varð fjórfaldur HSK meistari, sigraði í 100 m grindahlaupi, þrístökki, langstökki og stangarstökki. Þær Edda Þorvaldsdóttir, Agnes Erlingsdóttir, Anna Páldsdóttir, Jóhanna Bríet Helgadóttir og Anna Björk Ómarsdóttir urðu allar  tvöfaldir HSK meistarar og Eyrún Halla Haraldsdóttir varð HSK meistari í kringlukasti í stúlknaflokki.

Jóhanna Bríet Helgadóttir bætti sinn besta árangur í kringlukasti (600 gr) um rúma 2,5 m þegar hún kastaði kringlunni 26,36 m og hún bætti sig einnig í spjótkasti um tæpa 2 metra þegar hún kastaði því 23, 07 m. Eyrún Halla Haraldsdóttir bætti sinn besta árangur í kringlukasti (1 kg) um 4 metra þegar kringlan hjá henni flaug 26,31 m. Agnes Erlingsdóttir bætti sig um 1 sek í 100 m grindahlaupi þrátt fyrir mótvind þegar hún hljóp vegalengdina á 19,43 s og Anna Pálsdóttir bætti sig um 20 cm í spjótkasti þegar hún fleygði spjótinu 30,38 m. Frjálsíþróttafólk Umf. Selfoss var næst í eldlínunni á Risalandsmóti UMFÍ í Kópavoginum sem lauk 8. júlí.