Frálsíþróttir

Meistaramót Íslands 15-22 ára var haldið að Laugum í Þingeyjarsýslu helgina 25.-26. ágúst s.l. Frjálsíþróttadeild Umf. Selfoss sendi vaska sveit til leiks og stóðu þau sig öll með mikilli prýði. Afrakstur helgarinnar var 6 gullverðlaun, 2 silfurverðlaun, 4 bronsverðlaun og 1 HSK met.

Örn Davíðsson náði þeim frækilega árangri að verða fjórfaldur Íslandsmeistari í drengjaflokki þrátt fyrir að vera á yngra ári í flokknum. Örn sigraði glæsilega í spjótkasti með 50.64m, í kúluvarpi með 14.83m löngu kasti, kringlunni kastaði hann einnig lengst allra eða 49.38m og að lokum stökk hann 1.78m í hástökki og fjórði Meistaratitillinn var í höfn.  Að auki vann Örn til bronsverðlauna í sleggjukasti er hann kastaði sleggjunni 36.68m og bætti sinn fyrri árangur um 2.15m og í þrístökki er hann stökk 11.69m.  Frábær árangur hjá þessum efnilega pilti. 

Agnes Erlingsdóttir varð Íslandsmeistari í 300m grindahlaupi stúlkna þegar hún hljóp keppnislaust í veikari riðli hlaupsins á 48.31sek og bætti sig um rúmar 2 sekúndur og Fjóla Signý Hannesdóttir varð Íslandsmeistari þegar hún sigraði í 100m grindahlaupi í stúlknaflokki á tímanum 16.91s í mótvindi.

Eyrún Halla Haraldsdóttir bætti sinn besta árangur í kringlukasti um 3.66m þegar hún kastaði kringlunni 29.97m og vann til silfurverðlauna í stúlknaflokki.  Jóhanna Bríet Helgadóttir var í feiknarstuði í sleggjukasti, hún kastaði sleggjunni 28,80m og vann til bronsverðlauna í meyjarflokki og bætti um leið HSK met Önnu Bjarkar Ómarsdóttur Umf .Selfoss frá árinu 2004 um 1.64m.    Stúlknasveit Umf. Selfoss sem skipuð var þeim Þórhildi Helgu Guðjónsdóttur, Sólveigu Söru Samúelsdóttur, Fjólu Signýju Hannesdóttiu og Andreu Ýr Bragadóttur vann til silfurverðlauna í 4x100m boðhlaupi og  Sólveig Sara Samúelsdóttir vann til bronsverðlauna í langstökki þegar hún stökk 4.79m í stúlknaflokki.

Áslaug Ýr Bragadóttir bætti sinn besta árangur í kúluvarpi um 48cm þegar hún kastaði kúlunni 9.46m og hún bætti sig um heila 5 metra þegar hún kastaði sleggjunni 24.44m í meyjaflokki.  Að  lokum bætti Þórhildur Helga Guðjónsdóttir sig í langstökki og þrístökki , hún stökk 4.71m í langstökki og 9.47m í þrístökki.

Frjálsíþróttadeild Umf .Selfoss varð í öðru sæti stigakeppninnar í drengjaflokki og í þriðja sæti í stúlknaflokki og hafnaði liðið  í 7.sæti í heildarstigakeppni mótsins.  Glæsilegur árangur hjá krökkunum á síðasta stórmóti sumarsins.