Frálsíþróttir

Á lokahófi knattspyrnudeildar, sem haldið var s.l. laugardagskvöld á Hótel Selfoss, kom fram í ræðu bæjarstjóra Árborgar, Ragnheiðar Hergeirsdóttur, að ráðist verður í byggingu nýs íþróttavallar á íþróttasvæðinu við Engjaveg strax í haust. Við sama tækifærri færði Ragnheiður knattspyrnudeildinni ávísun frá Árborg upp á 750.000 kr. fyrir frábæran árangur. Eru þetta mikil gleðitíðindi fyrir félagið og ánægjulegt að fá loks viðunandi aðstöðu fyrir knattspyrnuleiki og frjálsar íþróttir. Einnig er þetta höfðinglegur stuðningur við meistaraflokkinn í knattspyrnu.

Fram kom hjá Ragnheiði að undirbúningur og framkvæmdir munu hefjast fljótlega og er áformað að hægt verði að hefja leik á Íslandsmótinu í 1. deild næsta vor. Völlurinn verður af fullkomnustu gerð með topp aðstöðu fyrir frjálsar íþróttir og knattspyrnu ásamt áhorfendastæðum. Með þessu framtaki sýna bæjayfirvöld ákveðna framsýni. Framundan er vinna hjá knattspyrnudeild við að uppfylla skilyrði leyfiskerfis KSÍ sem félög í 1. deild og úrvalsdeild þurfa að uppfylla. Einn þáttur í því eru mannvirkjalegar forsendur.

Þó nokkur ár séu í Landsmót UMFÍ sem haldið verður á Selfossi 2012 þurfum við að koma okkur upp góðri frjálsíþróttaaðstöðu sem fyrst. Þannig getum við búið frjálsíþróttafólk okkar betur undir keppni við þá bestu. Einnig þurfum við að smyrja og slípa hina öflugu frjálsíþróttamaskínu sem svo oft hefur starfað ötullega á frjálsíþróttamótum á Selfossi í gegnum árin. Við þurfum að standa klár þegar landsmótsárið rennur upp.

Frábærar fréttir fyrir íþróttafólk og alla áhugamenn um íþróttir á Selfossi.