Handbolti

Strákarnir í 4. flokki Selfoss fór í gær ferð til Akureyrar og léku bæði A og B liðin gegn KA. Því miður var þetta ekki ferð til fjár því bæði lið töpuðu í æsispennandi leikjum. Möguleiki var í báðum leikjum að ná í það minnsta jafntefli og jafnvel sigri, en því miður fór ekki svo. B-liðið spilaði sinn besta leik í vetur og er það jákvætt. A-liðið hins vegar var langt frá sínu besta.

Framarar gerðu góða ferð til Selfoss í gær og unnu okkar menn 33-35 í hörkuleik. Selfyssingar leiddu í 57 mínútur af 60 í leiknum, en það dugir víst ekki.  Í hálfleik stóð 19-17 fyrir heimamenn.

Í gær sunnudag tók A lið 2. flokks á móti FH. Gestirnir mættu frískir en það entist bara fram að hálfleik en þá var staðan 18-14 fyrir Selfoss. Í seinni hálfleik settu okkar með í 5. gír og unnu sanngjarnan sigur 42-25.

Á laugardaginn mætti B liðið okkar A liði Hauka í 2. deildinni á Íslandsmótinu í 3. flokki. Haukar hafa ekki tapað leik í vetur og tróna á toppi deildarinnar. Haukar unnu 31-27. Staðan í hálfleik var 14-13 fyrir Hauka.

Í kvöld tóku okkar menn á móti Fjölni í 1. deildinni í handbolta. Það var ljóst frá upphafi í hvað stefndi því að heimamenn settu strax í fluggírinn og héldu honum allan tímann. Staðan í hálfleik var orðin 18-6 og leikurinn endaði síðan með öruggum 19 marka sigri Selfyssinga, 36-17.

Á þriðjudaginn var dregið í 8 liða úrslitum Eimskips bikars karla. Selfoss dróst á móti HK og verður leikurinn í Vallaskóla sunnudaginn 6. desember kl. 19:00. Í hinum leikjunum eigast við FH og Haukar, sama dag kl. 16:00, Valur og Fram mánudaginn 7. des kl. 19:30 og svo Víkingur og Grótta 7. des kl. 19:30. Nú verða Selfyssingar að þjappa sér vel saman og styðja strákana dyggilega í leiknum við HK.

Hádegisfundur ÍSÍ verður haldinn föstudagurinn 27. nóv. Jón Sigfússon framkvæmdastjóri og Álfgeir Logi Kristjánsson rannsóknarstjóri hjá Rannsóknum og Greiningu við HR munu fara yfir rannsóknina Ungt fólk 2009 og rýna í þá þætti sem snúa að íþróttum og/eða íþróttaiðkun. Fyrirlesturinn verður í E-sal Íþróttamiðstöðvarinnar í Laugardal frá kl. 12.00-13.00. Hann er ókeypis og öllum opinn á meðan húsrúm leyfir.

Á laugardaginn mættu strákarnir okkar, sem eru í B liði 3. flokks og spila í 2. deild Íslandsmótsins, liði HK sem er eitt það besta í deildinni. Strákarnir ákváðu að gefa allt í leikinn og sjá hverju það myndi skila. Það skilaði jafntefli 37-37 en í hálfleik var 18-18. Frábær leikur hjá strákunum. 

Liðsmenn meistaraflokks Umf. Selfoss í handbolta ásamt stuðningsmönnum stóðu fyrir gerð auglýsingarskiltis fyrir heimaleiki liðsins í vetur. Verður skiltið notar til að minna á leiki liðsins og verður staðsett á Austurvegi á leikdag. Skiltið var gert með stuðningi BYKO og eru plöturnar með nöfnum keppnisliðanna framleiddar í númeragerð fangelsisins á Litla Hrauni. Fagform skiltagerð á Selfossi annaðist merkingu þess. Vilja liðsmenn meistaraflokks og stuðningsmenn þakka ofangreindum aðilum stuðninginn.

Eldra lið 3. flokks (92) og yngra lið 2. flokks (91) léku bæði um helgina og verður að segjast eins og er að útkoman var fjarri því sem menn höfðu óskað sér. Tap niðurstaðan í báðum leikjum. 92 tapaði í Hafnarfirði fyrir FH og 91 í Eyjum fyrir ÍBV.

HSK mótið í 4. flokki í handknattleik fór fram í Vallaskóla í dag. Fjögur lið kepptu þar, tvö frá Selfossi auk þess sem Biskupstungur og Dímon frá Hvolsvelli léku á mótinu. Mótið gekk verulega vel og stóð Selfoss 1 að lokum uppi sem sigurvegari með fullt hús stiga (6 stig). Mikil barátta var milli hinna liðanna um sæti. Tveir af þremur leikjum þeirra lauk með jafntefli og náði Selfoss 2 að vinna Dímon með einu marki og tryggja sér þannig 2. sætið með 3 stig. Biskupstungur enduðu í 3. sæti með 2 stig og að lokum varð Dímon í 4. sæti með 1 stig.

HSK-mótið í 4. flokki fer fram um helgina. Á mótinu eru bæði lið Selfoss í flokknum auk þess að Dímon og Biskupstungur munu taka þátt. Mótið fer fram á sunnudaginn og er fólk eindregið hvatt að mæta og sjá skemmtilegt handboltamót. Leikjafyrirkomulag er hér fyrir neðan.

Í kvöld unnu okkar menn lið ÍR 32-28. Sigurinn var mun öruggari en tölurnar gefa til kynna, en Selfoss komst mest í 25-12 þegar um 19 mín. voru eftir af leiknum. Staðan í hálfleik var 16-9.

Í kvöld sækja ÍR-ingar Selfyssinga heim í 1. deild karla í handbolta. Þetta verður án efa stórleikur, eins og ávallt þegar þessi lið hafa mæst undanfarin tímabil. Eftir 5 umferðir er Selfoss í 2. sæti deildarinnar með 8 stig, en ÍR-ingar eru í 3.-4. sæti ásamt Víkingum með 6 stig. Selfyssingar hafa bara tapað einum leik með einu marki gegn Aftureldingu sem er efst í deildinni með fullt hús stiga. Nú er um að gera að skella sér í Vallaskóla í kvöld og sjá spennandi viðureign. Leikur Selfoss og ÍR hefst kl. 19:30.

Í gærkvöldi vann Selfoss lið Þróttar á útivelli 30 - 15 og er því komið í 8 liða úrslit Bikarkeppninnar. Sigurinn var sannfærandi eins og tölurnar gefa til kynna. Varnarleikur og markvarsla heldur áfram að vera aðall liðsins og þá lagaðist sóknarleikurinn aðeins frá síðustu leikjum.

Í gærkvöldi áttust við Þróttur og Selfoss í 16 liða úrslitum Eimskips bikars karla í handbolta. Fór leikurinn fram í Laugardalshöllinni. Margir hafa eflaust beðið spenntir eftir úrslitunum í 10 fréttunum í Sjónvarpinu og að fá að sjá svipmyndir úr leiknum. Í lok fréttatímans var sagt frá leik Hauka og Hauka 2, sem einnig var í 16 liða úrslitunum og sýndar myndir úr þeim leik. Ekki var svo mikið sem minnst einu orði á leik Þróttar og Selfoss, hvað þá að sýndar væru myndir úr leiknum. Með þessu er Sjónvarpið augljóslega að mismuna félögum.

Á sunnudaginn komu HK menn í heimsókn í 1. deildinni í 2. flokki. Okkar strákar voru mun betri í leiknum og skiluðu af sér 12 marka sigri 37 - 25 eftir að hafa leitt í hálfleik með 8 mörkum eða 17 - 9.

Haukar frá Hafnarfirði sóttu okkar menn heim í gær og léku gegn 91-liði Selfoss. Ekki var leikurinn neitt áferðarfallegur, en tvö stig í hús fyrir okkar menn er jú það sem skiptir öllu. 30-22 sigur eftir að í hálfleik stóðu leikar 13-10.

Á laugardaginn unnu heimamenn á Selfossi lið Mosfellinga 35-26 eftir að í leikhléi hafi staðið 17-13. Leikurinn var sveiflukenndur, en lauk þó með öruggum sigri okkar manna.

A-liðið í 4. flokki fór í Kópavoginn í dag að leika við HK. Um var að ræða hörkuleik sem var jafn lengst af. Selfyssingar voru lengi í gang, en náðu að leiða 14-15 í hálfleik og vinna 25-31 í furðulegum leik. Strákarnir stóðu saman þegar mest á reyndi og héldu áfram þrátt fyrir mótlæti og geta þakkað því að þeir náðu að sigra leikinn.

Fyrr í dag vann Selfoss lið ÍBV á erfiðasta útivelli landsins. Það var frekar sætur sigur því að í lokin stefndi allt í það að Selfoss myndi kasta frá sér sigrinum á sama hátt og gegn Aftureldingu á þriðjudaginn. Í þetta skipti var liðið þó ekki rænt sigrinum heldur má segja að liðið hafi í lokin stolið til baka því sem var búið að tapa niður, þ.e. sigri.

B-lið 4. flokks lék gegn FH í dag í Vallaskóla. Fyrri hálfleikur var jafn lengst af en í síðari hálfleik sigu FH-ingar fram úr og unnu 17-23. Selfoss bætti sig mikið frá seinasta leik þótt enn sé margt sem megi gera betur.

Það er margt að gerast í handboltanum hér á Selfossi um helgina. Á morgun fara fram tveir leikir í Vallaskóla. Kl. 13.00 Selfoss - UMFA í 3. fl. 1. deild. Strax á eftir þeim leik eða kl. 15.15 er leikur í 4. fl. B karla, Selfoss - FH. Á sunnudaginn fara fram þrír leikir. Kl. 12.15 Selfoss - Grótta í 3. fl. kvenna, tveir leikir í 2. fl. karla, kl. 17.00 og 18.45. Selfoss2 - Haukar2 og Selfoss - HK. Góða skemmtun og áfram Selfoss!

Gróttumenn af Seltjarnarnesi sóttu okkar heim á Selfoss í gærkvöld og léku í 3. flokki karla. Þeir höfðu ekki erindi sem erfiði og fóru heim tómhentir. Selfyssingar báru sigur úr býtum 38-33 eftir að hafa leitt í hálfleik 19-16.

Hvað á maður að segja annað en ótrúlegt! Selfoss átti sigurinn algjörlega skilinn í gær en á einhvern ótrúlegan hátt tapaðist leikurinn. Það má segja að það hafi verið margt smátt frekar en eitthvað eitt atriði sem varð til þess að leikurinn tapaðist. Sjá meira..

Strákarnir í B-liði 4. flokks mættu Gróttu í bikarnum um helgina. Selfoss liðið náði sér aldrei á strik í leiknum. Frá fyrstu mínútu voru okkar menn langt frá sinni eðlilegu getu. Í sókninni vantaði alla ákveðni og leikmenn virkuðu smeykir. Varnarlega var liðið afar lengi í gang.

Gamla myndin að þessu sinni er af 3.flokki karla á leið á Partille-cup trúlega sumarið 1992 eða 1993. Þjálfarar voru Einar Gunnar Sigurðsson og Daði Steinn. Þetta eru árgangar 1977 og 1978.Þarna voru kempur eins og Halli Geir, bræðurnir Gísli og Jói, Steindór Tryggva, Óttar, Bent o.fl.

Á föstudagskvöldið strax á eftir leiknum við Þrótt í mfl. tóku strákarnir í B-liði 3. flokks á móti ÍBV í 2. deild karla á Íslandsmótinu. Tæpri viku áður höfðu þeir spilað við ÍBV í Eyjum en þá vann ÍBV með 5 mörkum. Í þetta skipti snérist það við og Selfoss vann 29 - 26.

Á laugardaginn fór 2. flokkur til Akureyrar og mætti þar heimamönnum. Akureyri er með eitt besta liðið á landinu og því var þetta mikilvægur leikur í toppbaráttu deildarinnar. Akureyri tapar mjög sjaldan á heimavelli og það breyttist ekkert í þetta skipti. Akureyri vann leikinn 33 - 31.

Fyrsti heimaleikur A-liðs 4. flokks karla fór fram í Vallaskóla í dag. Hátt í 100 manns mættu á leikinn sem var vel leikinn af hálfu Selfoss. Strákarnir höfðu yfirhöndina nær allan leikinn og unnu að lokum góðan 32-25 sigur eftir að hafa verið einu marki yfir í hálfleik. Liðið fer því vel af stað á heimavelli í vetur.

Fyrr í kvöld mættu Þróttarar á Selfoss til þess að spila við Selfoss í 1. deild karla á Íslandsmótinu í handknattleik. Selfoss vann leikinn 35 - 22 eftir að hafa haft 11 marka forystu í hálfleik 21 - 10.   

4. flokkur karla leikur um helgina fyrstu heimaleiki sína í vetur. Á laugardag mætir A-liðið Haukum kl. 14:00. B-liðið leikur svo við Gróttu í bikar á sunnudag kl. 13:15. Fólk er eindregið hvatt til að mæta á leikina, en strákarnir í 4. flokki eru staðráðnir í að standa sig vel í vetur og vilja fá sem flesta til að koma á leikina í Vallaskóla í vetur.

Sunnudaginn 8. nóvember kl. 14:00 verður ungmennaþing Árborgar haldið í Pakkhúsinu, ungmennahúsi Árborgar að Austurvegi 2b, (fyrir aftan bókasafnið). Þingið er ætlað öllum ungmennum í Árborg á aldrinum 13 - 30 ára. Markmið þingsins er að skoðanir ungmenna úr öllum byggðarkjörnum Árborgar komi fram. Niðurstöður þingsins verða síðan afhent bæjarstjórn Árborgar.  Yfirskrift þingsins er: "Ekki sitja heima og röfla, komdu þinni skoðun á framfæri". Ragnheiður Hergeirsdóttir, bæjarstjóri Árborgar og Gylfi Þorkelsson, bæjarfulltrúi og formaður íþrótta- og tómstundanefndar munu ávarpa þingið. Boðið verður upp á léttar veitingar. Allir velkomnir

Strákarnir í B-liði 3. flokks fóru til Eyja um síðustu helgi. Nánast nýkomnir frá Ísafirði og Akureyri þar á undan. Í þetta skipti náðu þeir ekki að sigra "úti á landi" en A lið ÍBV reyndist betri aðilinn í þessum leik. Slæmur fyrri hálfleikur kostaði möguleika á sigri að þessu sinni

4. flokkur karla lék við Þrótt B í Laugardalshöllinni, en leikurinn var í 32-liða úrslitum bikarkeppninnar í 4. flokki. Yfirburðir Selfoss voru miklir og unnu þeir að lokum 39-13 sigur. Drengirnir eru því komnir í 16-liða úrslit bikarsins og þurfa núna þrjá sigra til viðbótar til í að komast í sjálfan bikarúrslitaleikinn.

Ragnar Jóhannsson er í viðtali á heimasíðunni í þesari viku. Ragnar er 19 ára unglingalandsliðsmaður. Hann lék með pressuliðinu gegn íslenska A-landsliðinu í siðustu viku og stóð sig mjög vel, skoraði 3 mörk með þrumuskotum og var hvergi banginn við stjörnurnar í landsliðinu. ....