Handbolti

Íþrótta- og útivistarklúbbur Umf. Selfoss hlaut í gær myndarlegan styrk úr Velferðarsjóði barna. Styrkurinn verður notaður til að niðurgreiða námskeiðin sem haldin verða í sumar. Er það m.a. gert til að tryggja börnum jafnan aðgang að námskeiðunum. Sveitarfélagið Árborg leggur verkefninu til fjármagn sem er liður í þjónustusamningi við Ungmennafélagið. Auk þess tengist það Vinnuskóla Árborgar. Klúbburinn er samstarfsverkefni allra deilda félagsins og veitir um 17 ungmennum vinnu í sumar.

Þær Kristrún Steinþórsdóttir, Birta Antonsdóttir, Hrafnhildur Hanna Þrastardóttir og Esther Hallsdóttir voru nú í vikunni valdar í unglingalandslið stúlkna fæddar 1994 og síðar. 30 stúlkur munu æfa saman um komandi helgi. Þessar stelpur voru lykilmenn í liði Selfoss sem varð íslandsmeistari í þessum flokki í vetur.

Átta ungmenni frá Selfossi voru valin í Handboltaskóla HSÍ, en í hann eru valin krakkar úr 8. bekk. Handboltaskóli HSÍ hefur verið starfræktur undanfarin 16 ár með góðum árangri. Í ár verður hann helgina 12. til 14. júní og gert er ráð fyrir yfir 100 krökkum sem æfa undir stjórn landsliðsþjálfara HSÍ.

Þeir Janus Daði Smárason, Gísli Þór Axelsson og Gísli Örn Þórisson voru á dögunum valdir í 22 manna landsliðshóp pilta í handknattleik leikmanna fæddir 1994 og síðar. Strákarnir æfðu stíft um síðastliðna helgi og stóðu sig vel að sögn þjálfara. Þess má geta að þeir Janus og Gísli Þór, sem eru báðir á yngra ári, eru lykilmenn í öflugu liði Selfoss sem varð í 3. sæti á Íslandsmótinu í vetur.