Handbolti

Á laugardaginn komu Þórsarar alla leið frá Akureyri í heimsókn. Til að byrja með var lítið af fólki á leiknum en áhorfendafjöldinn jókst eftir því sem leið á leikinn og var á bilinu 50-100 mættu þegar flestir voru. Leikurinn var mjög hægur og virtist framliggjandi vörn Þórsara fara illa með sóknarleik Selfysinga. En úr stöðunni 2-2 komst Þór í 3-8 og svo 8-16. Þrátt fyrir leikhlé hjá Adda og smá þáttöku áhorfenda á köflum virtust þeir ekkert ætla að fara í gang og var mikið um pirring. Þrátt fyrir það var enginn rekinn útaf í 2 mínútur í öllum fyrri hálfleik. Staðan í hálfleik var 12-17 eftir góðan lokakafla Selfyssinga.
Þórsarar héldu svo áfram að stríða Selfyssingum í síðari hálfleik og fór þar leikmaður númer 8 fremstur í flokki með frábærum varnarleik og með því að raða inn mörkunum þegar Þórsarar þurftu þess mest á að halda. Selfyssingar áttu þó ágætan sprett í síðari hálfleik og náðu að minnka muninn í 26-30. Undir lokin fór svo allt út um þúfur er tveir Selfyssingar fengu tveggja mínútna brottvísun á tíu sekúndna kafla og var dómgæslan ekki alltaf til fyrirmyndar. Þórsarar gerðu út um leikinn í lokakaflanum og sigruðu 27-34.

ÍGB