Handbolti

Bæði A og B lið fjórða flokks léku um helgina. Í vetur eru liðin tvö í 4. flokki en í fyrra voru þau þrjú alls. Í fyrra æfðu rúmlega 30 strákar í 4. flokki en í vetur eru þeir 24.

Í gær lék B liðið á heimavelli gegn Haukum og tapaðist sá leikur því miður, 16-22. Haukar léku framliggjandi vörn sem okkar strákar réðu illa við. Mikið af grip-og sendingarmistökum leit dagsins ljós, alls 19 þannig mistök í leiknum sem er auðvitað fjarri því að vera gott. Í hálfleik leiddu Haukar 9-14 en Selfyssingar skoruðu fjögur fyrstu mörk seinni hálfleiks og staðan skyndilega orðin 13-14, aðeins eins marks munur. Það dugði þá skammt því Haukarnir juku forskotið aftur og unnu að lokum með sex mörkum.
Bogi Thorarensen markmaður var besti maður liðsins og varði oft vel.

A liðið lék einnig í gær og sótti Valsara heim á nýjan og glæsilega heimavöll þeirra. Óhætt er að segja að okkar menn hafi sett tóninn strax í upphafi því þeir komust fljótlega í fimm marka forystu og og héldu henni út fyrri hálfleik, en þá stóðu leikar 7-12. Valsarar mættu grimmir til seinni hálfleiks og slógu Selfyssinga tímabundið út af laginu og skyndilega staðan orðin 10-12. Þá sögðu strákarnir hingað og ekki lengra og juku forskotið jafnt og þétt á nýjan leik. Lokatölur urðu 20-30 fyrir Selfoss sem verður teljast gott því Valsmenn hafa á góðu liði að skipa.

Í sókninni bar mest á þeim Guðmundi Þórarinssyni og Anton Frey Traustasyni sem skoruðu mörg frábær mörk sín á milli. Ekki má gleyma miðjumönnunum Einari Sverrissyni og Ármanni Ólafssyni en báðir áttu þeir góðan leik. Ketill Hauksson átti einnig góðan leik og þá sér í lagi í vörn, hann skoraði einnig nokkur falleg mörk. Allir skiluðu miklu til liðsins þó þeir hafi ekki verið háir á markaskorunarlistanum. Guðjón Þórsson varði nokkrum sinnum vel í leiknum og er hann vaxandi markmaður. Gaman verður að sjá hvernig honum mun vegna í vetur.