Handbolti

Fyrir stuttu lék B lið 4. flokks tvo leiki. Strákarnir í þessu liði eru fæddir 1993 og hafa bætt sig með hverri vikunni sem af er tímabilinu. Þjálfararnir Baldur og Arnar eru sáttir við framfarir þeirra þó ekki hafi enn unnist leikur í deildinni. En breyting verður á því, það er alveg á hreinu.

Laugardagur  3. Nóvember.   Selfoss2 – FH2
Selfossliðið mætti í leikinn af fullum krafti og voru staðráðnir í því að bæta fyrir hrakfarir síðasta leiks gegn Haukum. Jóhann Gylfi kom inn í liðið aftur eftir fjarveru í Haukaleiknum og skipti það sköpum fyrir vörnina. Hann og Árni Felix náðu einstaklega vel saman í miðju varnarinnar og lömdu FH strákana miskunnarlaust. Sóknarleikurinn var einnig fínn, FH-ingarnir spiluðu passíva 3-2-1 vörn sem hentaði okkur ágætlega og skilaði það sér í tveggja marka forystu í hálfleik. Þrátt fyrir yfirlýsingar í hálfleik að missa þetta alls ekki niður og halda áfram að berjast þá gerðist algjörlega andstaðan, FH skoruðu 7 mörk í röð í byrjun seinni hálfleiks og hreinlega kláruðu leikinn. Strákarnir urðu pirraðir og misstu því einbeitingu og sást því aldrei aftur til sólar upp frá þessu. FH-ingar unnu því 24-19 eftir staðan hafi verið 10-12 fyrir Selfoss í hálfleik. Okkar bjartasti punktur í þessum leik var samt klárlega leikur Jóhanns Guðmundssonar hornamanns sem átti frábæran dag í vörninni og skoraði auk þess 4 mjög góð mörk.

Sunnudagur 4. Nóvember.   Selfoss2 – HK2
Svipað var uppi á tengingum í þessum leik. Selfossliðið mætti ákveðið til leiks en var hins vegar alltaf rétt svo skrefinu á eftir mjög góðu HK liðinu. Þegar leið á fyrri hálfleikinn fór hins vegar allt að smella, strákarnir lokuðu vörninni og áttu HK-ingar engin svör við því og leiddum við í fyrri hálfleik með tveimur mörkum, rétt eins og í leiknum við FH daginn áður. Og eins og fyrri daginn voru strákarnir staðráðnir í að halda þessu forskoti og halda áfram að berjast, hins vegar fóru HK menn að verjast mun framar og spiluðu sterka 3-2-1 vörn sem okkar strákar réðu lítið sem ekkert við, reiðileysi einkenndi sóknina og áttum við þó nokkrar mislukkaðar sendingar í hendur andstæðinganna. Vörnin hætti einmitt að vinna saman og vantaði greinilega þó nokkuð upp á fótavinnu og þá sérstaklega einbeitingu, en stundum virtist sem okkar strákar hreinlega voru ekki með á nótunum og alltof mörg aulaleg mistök áttu sér stað. Hk vann 27-23 eftir að okkar menn höfðu yfir 15-13 í leikhléi.

Í sókninni var Daníel Sebastíansson atkvæðamestur með 6 mörk og var einn af fáum sem átti ef svo má orða jákvæðan dag, einnig varði Jóhannes Erlingsson markvörður úr 5.flokki á köflum vel í markinu en hann stóð þar í fjarveru Boga Péturs sem því miður veiktist rétt fyrir leik og gat því ekki spilað.

Þetta lið á leik á laugardaginn næsta í Mýrinni kl. 09.30. Ekki slæm tímasetning það!