Handbolti

Sverrir var í markinu, Andri Már og Árni Steinn í sitthvoru horninu, Örn Þrastarson á miðjunni, Orri og Andri Hrafn voru í skyttunum og Þór á línu. Matthías Örn spilaði einnig mikið ýmist í skyttu eða á miðjunni og Trausti kom nokkuð við sögu í hornunum tveimur. Kamil kom líka inná í hægra hornið.

Í gærkvöld klukkan 20:30 hófst efstu deildar leikur ÍR-inga og Selfysinga. Bæði lið notuðu 6-0 vörn. Það var mjög mikið um áhorfendur og óvenju margir ÍR-ingar voru mættir til að hvetja sína stráka.

Selfoss hafði yfirhöndina allan fyrri hálfleikinn og fór úr 3-1 í 7-4 og staðan í hálfleik var 13-10. Allt Selfoss liðið spilaði frábærlega jafnt í vörn sem í sókn en þar fór Andri Már fremstur í flokki, ásamt stönginni.

Síðari hálfleikurinn byrjaði og Selfysingar héldu forystunni og voru komnir í 18-15 þegar ÍR tók yfirhöndina. Það er stór spurning hvað gerðist vegna þess að fyrr en varði komust ÍR-ingar í 18-21 og Selfoss strákarnir virtust algjörlega ráðvilltir. Þrátt fyrir baráttu nokkurra einstaklinga héldu ÍR forystunni og enduðu kvöldið með 20-26 sigri á Selfoss 2.

Með þessu tapi er Selfoss 2 liðið í 9.sæti efstu deildar unglingaflokks karla ásamt KA og FH 2 með 2 stig eftir 5 leiki. Hins vegar er 90 árgangurinn hjá Selfysingum í 2.sæti deildarinnar með 6 stig eftir 4 leiki ásamt Haukum, tveimur stigum eftir 1.sætinu en það sæti verma FH-ingar með 8 stig.

Meira um riðilinn er hægt að sjá hér: http://www.hsi.is/displayer.asp?cat_id=73

Ívan Guðjón