Handbolti

Á laugardag komu Haukar í heimsókn til að etja kappi við yngra árs lið okkar í 3. flokki karla. Haukar hafa á að skipa nokkuð sterku liði og hafa innaborðs fjölmarga landsliðsmenn.

Leikurinn byrjaði illa fyrir Selfyssinga og náðu gestirnir snemma forustunni í leiknum. Mestur varð munurinn sex mörk og gekk Selfyssingum illa bæði sóknar-og varnarlega í upphafi leiks. Í hálfleik stóðu leikar 11-16 Haukum í vil.

Í seinni hálfleik var mun beittara Selfosslið mætt til leiks og náðu þeir að minnka muninn í þrjú mörk og áttu tækifæri til að minnka í tvö. Haukar setti þá tvö mörk í röð og hélst munurinn í fimm mörkum. Lokatölur 27-32 fyrir Hauka, með smá heppni hefðu strákarnir getað komist enn nær.

Spilamennska Selfyssinga hefur batnað með hverjum leiknum og framfarirnar eru allnokkrar. Hafa ber í huga að öll liðin í deildinni (nema eitt) hafa marga leikmenn á eldra ári og flest þeirra eingöngu leikmenn á eldra ári.

Matthías skoraði nokkur falleg mörk, alls níu og Árni Steinn var markahæstur með 10 mörk og átti sinn langbesta leik í langan tíma. Andri Már lék einnig vel í vinstra horninu. Sverrir varði frábærlega í fyrri hálfleik en fjaraði út í þeim síðari.

Vörnin var ágæt lengst um með Orra, Þór og Matthías sem fremstu menn.

Mun meira býr í mönnum eins og Trausta Eiríkssybi og sérstaklega Erni Þrastarsyni. í liðið vantaði Andri Hallsson og munar um minna. Orri Davíðsson leysti stöðu hægru skyttu af með sóma.

Næsti leikur liðsins er gegn Fram í Safamýri nk. laugardag.