Handbolti

Sebastian Alexandersson, þjálfari Selfossar, er hér í spjalli varðandi leik þeirra gegn FH sem fram fer í dag í 1. deild karla. kl. 19:30 á Selfossi.
Nú færðu topplið FH í heimsókn í kvöld, verður þetta erfiður róður fyrir ykkur?
FH er eina taplausa liðið í deildinni og hefur að mínu mati verið að spila best það sem af er vetrar í okkar deild. Þeir virðast alls ekki líklegir til þess að misstíga sig á næstunni. Ég reikna þess vegna með því að þetta verði einn af okkar erfiðustu leikjunum í vetur en með góðum stuðningi áhorfenda er allt hægt. Það er alls ekkert auðvelt að sækja sigur á Selfossi og FH mun þurfa að hafa verulega fyrir því ef það á að takast hjá þeim.

Getur þú stillt upp þínu sterkasta liði í kvöld?
Nei, það eru 3 lykilmenn meiddir og hafa verið það núna uppá síðkastið. Birkir F. Bragason, sem að mínu mati er langbesti markmaðurinn í  1. deild og sá efnilegasti á landinu um þessar mundir, er handarbrotinn og þá eru 2 af sterkustu varnarmönnum okkar meiddir þeir Baldur Þór Elíasson og Arnar Gunnarsson sem jafnan spila í miðri vörninni. Þar fyrir utan eru nokkrir aðrir með smávægileg óþægindi eins og gengur og gerist í öllum liðum. 

Hver eru helstu styrk- og veikleikar FH liðsins?
Þeir spila mjög góða vörn þar sem Ólafur Guðmundsson er algjör lykilmaður og auk þess sem hann frábær hraðupphlaupsmaður. Sóknarlega eru þeir með góða unga skotmenn í bland við reynslumikla leikmenn sem kunna þetta allt þegar á þarf að halda. Það er athyglisvert að bæði toppliðin, FH og ÍR, hafa einmitt þessa eldri leikmenn sem þora að taka af skarið þegar á þarf að halda en ég tel að það sé einmitt það sem gerir gæfumuninn í þessari deild. 

Hvernig leggur maður Fimleikafélagið af velli?
Með frábærum stuðningi okkar áhorfenda og algjörri einbeitingu á það sem skiptir máli og hefur verið lagt upp fyrir leikinn. 

Verður stemming í Mjólkurbænum í kvöld?
Ég held að við förum að nálgast 500 manna múrinn í áhorfi í kvöld sem þýðir að við erum mjög nálægt því að fylla húsið. Upp á síðkastið hefur við að koma um 350 - 400 manns á leikina. Já ég held að það verði frábær stemmning og mikil skemmtun fyrir fólk sem kemur á leikinn í kvöld. Við erum jú með bestu umgjörðina í 1. deild og það þarf að standa undir því.

tekið www.handbolti.is