Handbolti

B lið 4.flokks tók á móti Þórsurum frá Akureyri, í því sem reyndist vera hörkuleikur.  Selfossliðið byrjaði fyrri hálfleikinn alveg skelfilega, 6-0 vörnin náði engan veginn að smella og ekki var sóknarleikurinn skárri.  Aulamistök og reynsluleysi gerðu það að verkum að okkar menn náðu engan veginn að keyra upp hraðann og síðan þegar í sóknina var komið gekk mest allt á afturfótunum.  Þórsarar gengu því á lagið og leiddu allan fyrri hálfleikinn.  Hálfleikstölur voru 9-12, Þór í vil. 

Eftir kröftuga hálfleiksræðu frá Adda mættu okkar strákar síðan ákveðnir til leiks, breyttu yfir í 3-2-1 vörn, með Jóhann Gylfa fyrir aftan sem átti fínan seinni hálfleik í vörninni og Árni Felix var fyrir framan.  Boltinn fékk að fljóta fínt í sókninni og hægt og bítandi komu strákarnir sér betur inn í leikinn og náðu forystu.  Selfoss náði á köflum ágætis forystu og áttu mörg tækifæri til að klára leikinn en einhvern veginn virtist sem smá sviðsskrekkur væri í okkar mönnum, þar sem okkar strákar eru ekki vanir að vera yfir í leikjum vetrarins þar sem enn hafði ekki náðst stig.  Þeir náðu hins vegar að hrista það af sér og góður 27-23 sigur staðreynd, og það fyrsti sigur tímabilsins.  Sannarlega frábært að ná því og má alveg búast við því að fleiri stig fari að hrannast inn í komandi leikjum þar sem okkar strákar hafa verið í mikilli framför.  Þeir sem sköruðu hvað mest fram úr hjá okkar mönnum voru Jóhann í vörninni, og einnig átti Daníel Sebastiansson mjög góðan síðari hálfleik í sókninni sem og Árni Felix á miðjunni.