Handbolti

Zoran Ivic er fæddur 29. janúar 1955 í Serbíu og er með gráðu frá Íþróttaháskólanum í Belgrað og hefur haft það að atvinnu að vera þjáfari frá 1991. Hann hefur þjálfað nokkur af bestu liðum Serbíu bæði í karla og kvennaflokki og náð góðum árangri, t.d. kom hann kvennaliði Buducnost í undanúrslit Meistaradeildarinnar tímabilið 1999 - 2000. Hann hefur þjálfað ýmis unglingalandslið karla frá 1997 og er í dag með U-21 liðið. Þá hefur hann verið aðst.þjálfari A-landsliðs karla fyrst 1997 - 2003 þegar liðið varð í 3. sæti á HM 1999 & 2001 og svo aftur frá 2006 og er í dag er aftur aðst.þjálfari A-liðsins. Í millitíðinni var hann aðalþjálfari A-landsliðs kvenna 2003 - 2004 sem varð í 9. sæti á HM í Króatíu 2003.

Hann hefur það orðspor á sér að vera sérstaklega góður í að vinna með ungum leikmönnum og búa til góða leikmenn úr þeim enda hefur hann þjálfað marga af þeim leikmönnum sem eru nú í hinu efnilega A-landsliði Serba sem keppti við Ísland 17. júní síðastliðinn.

Það er ljóst að það er gríðarlegur fengur fyrir handboltann á Selfossi að fá þennan mann í heimsókn. Við munum reyna að fara með hann á æfingar hjá sem flestum flokkum á meðan hann er hér og sýna honum okkar frábæra uppbyggingarstarf. Þá munum við sýna honum allt prógram akademíunnar og fá hans skoðun á því starfi. Loks þá mun hann stýra nokkrum æfingum og vonandi geta þjálfararnir okkar lært eitthvað nýtt hjá honum.

"Þetta er bara merki um og staðfesting á þeim gríðarlega metnaði sem við höfum til þess að skara fram úr á öllum sviðum í okkar starfi. Við höfum verið að fá nokkra af bestu þjálfurum Íslands í heimsókn og nú er komið að því að sjá hvað er verið að gera annars staðar." sagði Sebastian yfirþjálfari handboltaakademíunnar um komu Ivic. Aðspurður um hvort þetta væri ekki dýrt þá sagði hann ennfremur: "Að sjálfsögðu kostar þetta, en þetta er bara einn þáttur í rekstri akademíunnar. Þetta verkefni er að velta mörgum milljónum á ári og í dag erum við með 4 starfsmenn og fyrirsjáanlegt að þeim muni fjölga með þessu áframhaldi. Með aukinni starfsemi þá er nauðsynlegt að víkka sjóndeildarhringinn og bjóða okkar strákum uppá eitthvað nýtt. Það má svo deila um það hvað er dýrt í samanburði við það sem við munum fá út úr þessu fyrir þjálfunina og iðkendurnar okkar í framhaldi af því."

Fyrir þá sem eru forvitnir og viljal vera viðstaddir æfingarnar sem Ivic mun stjórna þá má alveg setja sig í samband við Sebastian og ræða það við hann.