Handbolti

A lið 4. flokks tók á móti ósigruðu liði Gróttu í miklum toppbaráttuslag í 2.deild nú á sunnudaginn síðasta.  Gróttumenn gjörsigruðu okkar stráka í fyrri leik liðanna í vetur og því greinilega erfiður leikur fyrir höndum.  Okkar strákar mættu hins vegar fullir sjálfstraust til leiks og gáfu Gróttu strákum ekkert eftir, og var staðan í hálfleik jöfn, 12-12.  Síðari hálfleikinn leiddu okkar strákar síðan alveg frá upphafi og uppskáru frábæran sigur á toppliðinu, 25-22, og hefði sigurinn alveg getað orðið stærri.

Varnarleikur okkar stráka var frábær, og þegar vörnin er góð þá er markvarslan það yfirleitt líka, og átti Svenni mjög góðan dag í markinu og varði hátt í annan tug skota.  Sóknin var einnig fín, og spilaði Árni Felix mestan part á miðjunni mjög vel, í fjarveru Ármanns Óla, en hann er að jafna sig eftir aðgerð á læri, þar sem fjarlægja þurfti stálpinna úr lærinu sem sett var í hann eftir miður skemmtilegt snjóbrettaslys fyrir ári síðan.  Anton skoraði einnig fjöldan allan af glæsilegum mörkum úr hægri skyttunni og var Magnús sterkur á línunni, en hann hefur verið í mikilli framför í undanförnum leikjum.

Næsti leikur okkar stráka er laugardaginn 16. febrúar gegn grönnum okkar ÍBV í Vestmannaeyjum og verður sigur klárlega að nást til að halda í við Fram og topplið Gróttu til að eiga möguleika á að ná í úrslitakeppni, en einungis skilja 2 stig liðin að.