Handbolti

Fram úr Reykjavík heimsótti Selfoss-91 í gærkvöld og var fyrirfram búist við spennandi leik. Það varð aldrei raunin því Framarar höfðu undirtökin frá fyrstu sekúndu og virtist sem Selfyssingar væru á engan hátt tilbúnir í leikinn.

Framarar komust í 4-10 um miðjan fyrri hálfleiki og var sem Selfyssingar væru nauðugir að vera á staðnum, svo léleg var spilamennskan. Í hálfleik stóð 12-16 Fram í vil. Er stutt var liðið af síðari hálfleik var staðan orðin 13-20 fyrir Fram og fátt virtist koma í veg fyrir stórsigur þeirra. Þá tóku okkar menn kipp og minnkuðu muninn í 19-22. Eftir það var allur vindur úr okkar mönnum og Framarar unnu að lokum sanngjarnan sigur 24-30.

Selfoss lék geysilega illa í leiknum og var það óþekkjanlegt frá fyrri leikjum. Vörnin náði sér ekki á strik og sóknin, sem hefur verið að koma til, var vægast sagt hörmuleg.

Skástu menn Selfoss voru Árni Steinn Steinþórsson með 12 mörk og Sverrir Andrésson markmaður með 18 skot varin. Þór Davíðsson lagði sig allan fram en fékk ekki mikinn stuðning. Orri Davíðsson virtist vera að vakna til lífsins er hann meiddist á ökkla í fyrri hálfleik og tók ekki frekari þátt í leiknum.

Selfyssingar þurfa all verulega að taka sig saman í andlitinu og hugsa sinn gang og athuga hvernig þeir koma undirbúnir til leiks. Kannski má skella þeirri skuld á þjálfarann að hafa ekki haft sína menn tilbúna í leikinn.

Markaskor:
Árni Steinn 12
Matthías 3
Orri 3
Þór 2
Andri Már 1
Andri Halls 1
Kamil 1
Örn 1