Handbolti

4. flokkur b liða spilaði um helgina tvo leiki, annan á laugardag gegn Gróttu á Seltjarnarnesi og þann síðari á heimavelli gegn HK. Fyrri leikurinn fór ekkert alltof vel, því okkar strákum var hreinlega slátrað. Ljóst var greinilega frá upphafi leiks að þetta ætti ekki eftir að vera skemmtiför fyrir okkar stráka því Grótta leiddi frá fyrstu mínútu til þeirrar síðustu.  Framliggjandi vörn okkar virkaði engan veginn og sóknin brást algjörlega. Staðan í hálfleik 17-10 fyrir gestina. Í síðari hálfleik bökkuðum við niður í 6-0, sem virkaði mun betur, en þýddi hins vegar lítið því við vorum manni ef ekki tveim mönnum færri mest allan síðari hálfleikinn.  Margt af því reyndar full harðar brottvísanir, sem síðan fór að fara í skapið á okkar strákum, sem orsakaði fleiri ótímabærar brottvísanir. Lokatölurnar því 31-17 fyrir topplið Gróttu.

Síðari leikur helgarinnar var síðan gegn HK, sem er einu sæti og 7 stigum ofar á töflunni. Leikurinn byrjaði ekkert alltof vel og höfðu HK strákar yfirhöndina mest allan fyrri hálfleikinn. Þeir komust m.a. í 4-1 og 6-3 og útlitið ekkert alltof bjart.  Voru þá aðallega þeirra hornamenn sem voru að gera okkur ljótan grikk og skora hvert glæsimarkið á fætur öðru. Selfyssingar náðu hins vegar að rétta úr kútnum minnkuðu muninn og voru hálfleikstölur 12-13 fyrir HK. Okkar strákar komu síðan ákveðnir til leiks í seinni hálfleik og voru allir að spila mjög vel. Árni, Daníel og Jóhann Gylfi spiluðu vel fyrir utan í sókninni og Guðjón átti góða innkomu í hægra hornið og skoraði nokkuð góð mörk, þess fyrir utan að vörnin var frábær í síðari hálfleik, og um leið og vörnin er góð þá fer markmaðurinn að verja og það skilaði sér í dag. Okkar strákar sigldu framúr og unnu verðskuldaðan sigur 28-26. Næsti leikur er síðan gegn Gróttu á heimavelli 9. mars og eiga okkar strákar klárlega harma að hefna.