Handbolti

Strákar fæddir 1991 í handboltanum á Selfossi gerðu sér aldeilis glaðan dag síðastliðinn laugardag. Leikmenn ásamt þjálfara hittust kl 13.00 í Vallaskóla og horfðu á leik Selfoss og Hauka í 2. flokki. Strax að þeim leik loknum var brunað í Laugardalshöllina og horft á leik Fram og Vals í bikarúrslitum Eimskipsbikarsins.

Eftir að þeim mikla barsmíðaleik lauk borðuðu leikmenn saman á hinum ágæta stað Menam á Selfossi. Þar var boðið upp á fjórfaldan kofarétt sem var aldeilis magnaður í alla staði.

Toppurinn á deginum var svo vitaskuld kl. 22.10. Þá fóru allir saman að berja mesta og besta leikara sögunnar augum, sjálfan Sylvester Stallone. John Rambo horfðu menn á með mikilli lotningu og aðdáun. Til hvers þarf margar herdeildir á meðan til er fólk eins og Rambo?

Strákarnir voru mjög sáttir við þennan dag sem tókst mjög vel og allir voru sammála um hver hápunktur dagsins var. Það var svo sannarlega Rambo! "Stallone er einfaldlega ógeðslega töff, flottasti maður heims" sagði Andri Már hornamaður og Árni Steinn bætti við "mig langar til að verða svona töff og ætla að reyna að verða það". Matthías. Orri og Þór voru allir sammála um að Stallone bæri af í elegans og að hann gæti nýst vel í vörninni.

Menn voru sem sagt sáttir við daginn og allir eru þeir nú orðnir Stallone-aðdáendur!