Handbolti

Niðurstaðan var því 29 - 30 tap fyrir liðinu sem deildi neðsta sæti deildarinnar með Þrótti. Það hefur loðað við Selfossliðið að byrja alltaf illa á móti bæði Haukum 2 og Þrótti í vetur og eru undantekningarlaust þetta 0 - 3 til 0 - 5 undir í byrjun leikjanna. Síðan þegar liðið hefur loksins leik þá hefur tekið við mikil barátta við að snúa leiknum sér í hag. Hingað til hafa svona byrjanir endað með sigri okkar manna en ekki í þetta skiptið. Selfossliðið lék sér einum sinni of oft að eldinum að þessu sinni og í þetta skipti brenndu þeir sig. Haukar stóðust áhlaupið að þessu sinni og unnu því fyrir stigunum en okkar menn verða að fara í naflaskoðun varðandi hugarfar gagnvart undirbúningi fyrir leiki. Það er ekki nóg að vera stemmdur á móti betri liðunum og mæta svo kærulausir til leiks á móti hinum.

Staðan í hálfleik var 12 - 16 fyrir gestina en leikurinn endaði 29 - 30 fyrir Hauka. Hjá Haukum átti Aron stórleik og varði mjög vel allan leikinn. Ekki er hægt að gera upp á milli annarra leikmanna Hauka en liðið allt stóð sig vel að þessu sinni.

Í Selfossliðið vantaði Birki sem meiddist á æfingu stuttu fyrir leik, Arnar sem var í leikbanni, Hörð Bjarnar sem var að jafna sig eftir flensuna og Baldur sem var ekki í hóp að þessu sinni. Liðið var óþekkjanlegt í fyrri hálfleik. En í seinni hálfleik náði það að sýna eðlilegan leik. Vörnin batnaði sem og sóknin enda voru okkar menn gríðarlega nálægt því að snúa þessu yfir í sigur enn einu sinni eða a.m.k. jafntefli en okkar menn unnu boltann þegar 20 sek. voru eftir af leiknum en skot Atla þegar 14 sek. voru eftir var varið og þar við sat. Mestu munaði þó líklega um það að alls 4 víti af 5 fóru forgörðum í leiknum og í svona jöfnum leik má það hreinlega ekki gerast.

Michal stóð sig frábærlega í sókn og skoraði alls 8 mörk og fékk 2 víti og eina brottvísun dæmda á andstæðing en það hefði mátt vera miklu meira. Það var sett nýtt met í peysutogi í þessum leik en búningurinn hans Michal var rifinn á 6 mismunandi stöðum eftir leikinn þannig að hann hékk í henglum utan á honum. Afspyrnuslakir dómarar leiksins leyfðu virtist vera nánast hvaða aðferðir sem var til þess að stöðva hann án refsinga við hæfi. Þá átti Sjóli frábæra innkomu síðasta korterið og spilaði best okkar manna að þessu sinni og hefði í raun mátt koma miklu fyrr inná því hann kom með þann kraft sem liðið þurfti svo sárlega á að halda í sókn. Þá voru nokkrir aðrir að reyna sitt besta og sýndu lipra spretti en allt of margir virtust hreinlega ekki vera með í þessum leik. 

Það verður aðeins að minnast á þátt dómarana í þessum leik. Þeir voru greinilega að gera sitt besta en því miður réðu þeir ekkert við þennan leik. Síðustu 15 mín. leiksins fóru þeir ítrekað á taugum eftir að leikurinn varð jafn og bitnaði frammistaða þeirra á báðum liðum og réði því ekki úrslitum. Það var þó áberandi hversu illa annar dómarinn þoldi álagið sem fylgdi leiknum og er sá drengur á engan hátt reiðubúinn að dæma í þessari deild m.v. frammistöðu hans í gærkvöldi. Við vonum bara að þessir ungu dómarar muni koma sterkari til baka með aukinni reynslu.

Langt er næsta heimaleik en það vel var mætt í húsið og var stuðningurinn góður. Vonandi ná strákarnir betri leikjum og finni fyrra form í næstu leikjum.


Áfram Selfoss.