Handbolti

Ég vill taka það fram að ég hef verið ákaflega ánægður með framgang og framfarir liðsins í vetur. Deildin er miklu sterkari en í fyrra og frammistaða okkar og ÍR á móti Akureyri í Bikarnum og ekki síst leikur Víkings við Val í undanúrslitunum sýnir bara hversu mikil gæði eru í þessari deild. Samt hefur okkur gengið betur í vetur en í fyrra og þrátt fyrir það að við höfum fram að þessum leik vissulega átt misjafna leiki þá höfum hins vegar samt sem áður klárað okkar verkefni án áfalla.


Fyrir þennan leik höfðum við einungis tapað fyrir, FH og ÍR, toppliðum deildarinnar og t.d. enn ekki tapað leik gegn hinu gríðarsterka Víkingsliði. Þá höfum við sýnt miklar framfarir á útivelli í vetur sem hefur gefið mér tilefni til þess að halda það að við séum að verða klárir í að gera atlögu að úrvalsdeildinni. Það eru mér því gríðarleg vonbrigði að við skyldum ekki vinna þennan leik og það á heimavelli þar sem stigataflan sýnir það klárlega að við séum með betra lið.


En það er alveg sama hversu gott lið er þá getur það aldrei unnið leiki með því einu að "eiga" að vera betri. Það verður að sýna það í verki. Það gerðum við svo sannarlega ekki í gær. Þetta er í raun fyrsta misstigið okkar í vetur og ég vona það bara að þeir frábæru áhorfendur sem hafa stutt okkur í allan vetur gefi okkur tækifæri til þess að svara fyrir leikinn í gær. Ég bið því stuðningsmenn okkar að fjölmenna á næsta heimaleik okkar gegn ÍR þann 4 apríl og gefa okkur annað tækifæri til þess að gera ykkur stolt af okkur.