Handbolti

Nú um helgina fór fram fjölmennasta íþróttamót á Selfossi á þessu ári, þegar Landsbankamótið í handbolta fór fram á Selfossi. Um 600 keppendur mættu til leiks, 62 lið lið tóku þátt og leiknir voru 140 leikir á þremur dögum. Mótið tókst með afburðum vel, allar tímasetningar stóðust og fjölmargir sjálfboðaliðar unnu frábært starf á mótinu. 50 dómarar dæmdu leikina 140 en þess má geta að þeir voru allir 17 ára og eldri. 55 tímaverðir úr 5. og 4. flokki sá um skráningar. Foreldrar strákanna í 4.flokki sá um sjoppu og lögðu fram mikla vinnu en allur ágóði af sjoppusölu fer í ferðasjóð.

Ætla má að yfir 1000 manns hafi heimsótt Selfoss um þessa helgi í tengslum við mótið. Þetta er í fimmta skiptið sem þetta mót er haldið og er það búið að festa sig í sessi í íþróttalífinu.

Forráðamenn annarra lið voru mjög ánægð með skipulag mótsins, það eina sem hægt var að kvarta yfir var að nýja íþróttahúsið við Sunnulækjarskóla sem er svo lítið að það er varla boðlegt að spila þar með 9. ára stráka og áhorfendaaðstaða þar er enginn.

Selfoss-strákarnir stóðu sig mjög vel á mótinu og unnu þrjár af fjórum deildum sem þeir tóku þátt í. Samanlagt unnu Selfyssingar 13 leiki og töpuðu þremur sannarlega glæsileg frammistaða.

Unglingaráð handknattleiksdeildar vill koma á framfæri þökkum til Landsbankans á Selfossi fyrir frábæran stuðning við yngri flokka starf handboltans á Selfoss og  til allra þeirra sem sem störfuðu á Landsbankamótinu og sérstaklega til starfsmanna íþróttahúsanna sem unnu sýna vinnu af miklum sóma, takk takk.