Handbolti

Leikur KA gegn 91-strákunum var spennandi og einkenndist af mikilli baráttu. Selfyssingar léku án Þórs Davíðssonar sem komst ekki í taka tíð í leikinn þar sem júdómót er hann tók þátt í tafðist frameftir degi. Þór vann gull á mótinu og er honum því fyrirgefið. Okkar menn byrjuðu leikinn hörmulega og komst KA í 2-7 og 3-9. Á þeim kafla varð Selfoss fyrir áfalli er Andri Hrafn Hallsson fór úr axlarlið í annað sinn á hægri hönd eftir um sex mínútna leik. Selfyssingar tóku við sér og náðu að jafna í 11-11 fyrir leikhlé.

Er síðari hálfleikur var um hálfnaður  varð Selfossliðið fyrir einu áfallinu enn er Orri Davíðsson meiddist á ökkla og gat ekki leikið meira í leiknum. Með því var liðið búið að missa tvo af sínum sterkustu varnarmönnum og þá fór vörnin að gefa eftir. Fram að því hafði Selfoss leikið geysilega sterka vörn og var komið í 21-17. KA náði að jafna 24-24 en komust ekki yfir. Selfyssingar voru ávallt fyrri til að skora og unnu að lokum 28-27. Frábær sigur fyrir strákana og hægt er að þakka hann ekki síst frábærum liðsanda og því að gefast ekki upp þrátt fyrir mikið mótlæti.

Matthías Halldórsson átti góðan leik og dróg vagninn hvað varnarleik varðar og stjórnaði honum vel. Einnig steig hann er á þurfti að halda í sókninni þar til hann var tekinn úr umferð þá tók Örn við og skoraði hann nokkur mikilvæg mörk. Árni Steinn átti góðan leik þó hann hafi oft verið með betri nýtingu en hann hefur bætt sig mikið varnarlega. Þá átti Sverrir frábæran leik og varði oft snilldarlega er liðið þurfti á að halda. Þá var Andri Már drjúgur sem og Anton sem enn er leikmaður 4.flokks. Orri kom einnig með flottan kraft inn í leik liðsins sem og Trausti.

Tölfræði:
Árni Steinn Steinþórsson 7 mörk, 10 brotin fríköst og 3 stoðsendingar
Örn Þrastarson 6 mörk, 5 brotin fríköst og 4 varin skot í vörn
Matthías Halldórsson 5 mörk og 13 brotin fríköst
Andri Már Sveinsson 3 mörk og 5 stoðsendingar
Orri Davíðsson 2 mörk og 6 brotin fríköst
Daníel Freyr Jónsson 2 mörk
Anton Freyr Traustason 2 mörk
Andir Hrafn Hallsson 1 mark
Sverrir Andrésson varði 30 skot