Handbolti

Fjórði flokkur B-lið spilaði 2 leiki núna rétt fyrir páska. Strákarnir gerðu jafntefli 18-18 við KA í Vallaskóla á sunnudaginn í mjög skemmtilegum leik. Í síðari leiknum töpuðu þeir fyrir HK 22-18 í Digranes í mjög svo döprum leik.

Selfoss liðið mætti ekki alveg nógu vel vakandi í fyrri hálfleik gegn KA en gestirnir komust fljótt á lagið og héldu um 2-3 marka forystu út fyrri hálfleik.  Okkar strákar náðu hins vegar að klóra í bakkann og með góðri vörn og skynsemi í sókninni var staðan jöfn í hálfleik 9-9.  Selfyssingar náðu síðan snemma forystu í seinni hálfleik, vörnin var fín og þá helst Jóhann Gylfi og Árni Felix sem héldu henni saman í miðjunni og þá gekk sóknin einnig fínt og bar þá helst á Jóhanni Gylfa og Ármanni sem átti fína spretti á köflum.  Selfoss hafði yfirhöndina allan síðari hálfleikinn, en það var einungis fyrir smá klúðurhátt í sókninni sem og að Selfyssingar fengu nokkrar brottvísanir undir lok leiksins að KA menn náðu að koma sér aftur inní leikinn og jafna á lokasekúndunum.  Jöfnunarmarkið skoraði markmaður þeirra KA manna, en þeir spiluðu mikið með 2 línumenn og markmanninn á miðjunni, s.s. 7 manna sókn, en okkar strákum tókst hins vegar mjög vel að stöðva það.

Síðari leikurinn var á þriðjudaginn gegn HK í Kópavogi.  Selfossliðið var engan veginn í gír í þeim leik, þó svo að fyrri hálfleikur hafi verið mun skárri en sá seinni, en hálfleikstölur voru 8-8.   Síðari hálfleikur byrjaði hins vegar skelfilega og skoruðu HK menn 9 mörk gegn 2 mörkum okkar á fyrstu 9 mínútum hálfleiksins og má þá segja að úrslitin hafi verið ráðin.  Sóknarleikurinn var mjög slappur og má með sanni segja að vörnin hafi gjörsamlega brugðist, var það helst Boga Pétri að þakka að munurinn var ekki stærri í lokin.  Má því segja að þetta hafi verið frekar döpur úrslit, miðað við hve frábær stígandinn í þessu liði er búinn að vera í vetur og sérstaklega undanfarnar vikur. Fyrir ári síðan voru þessir sömu strákar að tapa fyrir liðum eins og KA og HK með í kringum 20 mörkum í hverjum einasta leik.  Má því með sanni segja að okkar strákar séu á hraðri uppleið.