Handbolti

Tékkinn Michal Dostalic línumaður Selfyssinga hefur verið úrskurðaður í tveggja leikja bann af aganefnd HSÍ. Michal fékk rautt spjald í haust í leik gegn Haukum og fór þá í eins leiks bann. Á föstudag sl. fékk hann aftur rautt spjald, nú gegn Gróttu og fer hann því í tveggja leik bann. Næstu tveir leikir eru gegn ÍR heima á föstudaginn nk. og svo gegn Víkingi á útivelli.

Michal átti rauða spjald sitt fullkomlega skilið gegn Haukum, en alls ekki gegn Gróttu. Hann fór eingöngu með hendur sínar í brjóstkassa leikmanns Gróttu sem henti sér af heigulskap í gólfið og greip um andlit sitt og lét eins og honum hafi verið misþyrmt heiftarlega. Með réttu ætti leikmaður Gróttu að biðjast afsökunar á framferði sínu.

Það er leitt að dómarar falli fyrir slíkum "tilþrifum" og hafi þannig slæm áhrif á leikina. Sömu dómarar veifuðu einnig rauðu spjaldi á leikmann Selfoss er þeir töldu hann hafa farið í andlit leikmanns andstæðinganna. Sá leikmaður henti sér einnig í gólfið og greip um andlitið.

Við erum sammála um að stöðva þurfi ljót brot og hrottaskap, en "tilþrif" af þessu tagi eiga heldur ekki að sjást. Leikmenn eiga heldur ekki að komast upp með svona framkomu.

AG.