Handbolti

Síðastliðinn föstudag mættustu Selfoss og Fjölnir í íþróttamiðstöðinni í Grafarvogi.  Leikurinn fór fremur illa af stað hjá Selfossliðinu og virtist sem þær hefðu ekki trú á verkefninu. Staðan í hálfleik var 12-6, Fjölni í vil. Í síðari hálfleik snéru Selfyssingar blaðinu við og sýndu virkilega hvað í liðinu býr. Fjölnisstúlkur skoruðu einungis 3 mörk á móti 9 mörkum gestanna og lokatölur voru 15-15.  Þarna sýndi Selfossliðið mikinn viljastyrk og augljóst að á góðum degi geta þær unnið hvaða lið sem er í deildinni.

Sunnudaginn 26. nóvember s.l. fengu Selfyssingar Valsstúlkur í heimsókn. Segja má að frá byrjun hafi Valur haft yfirhöndina en þær spiluðu vörnina mjög framarlega sem truflaði mjög leik heimamanna. Í hálfleik var staðan 10-3, gestunum í hag. Síðari hálfleikurinn var heldur skárri hjá Selfossliðinu, mun meiri hreyfanleiki á leikmönnum í sókninni og mjög fínn varnarleikur. Lokatölur urðu 16-11 fyrir Val. Þrátt fyrir misjafnt gengi í þessum tveimur leikjum er ekki annað hægt að segja en að stelpurnar séu í mikilli sókn og hafa þær sýnt miklar framfarir síðustu mánuði. 

Næsti heimaleikur liðsins er laugardaginn 2. desember kl. 15, en þá koma KR-ingar í heimsókn. Fólk er hvatt til að mæta og styðja við bakið á stelpunum.