Handbolti

Strákarnir í  A-liði 4. flokks töpuðu í dag gegn Fram í miklum hörkuleik. Fram hefur hingað til haft besta liðið í þessum flokki. Jafnt var á flestum tölum í fyrri hálfleik, en Framarar skoruðu 3 síðustu mörk fyrri hálfleiks og höfðu yfir 12-14.
Í seinni hálfleik byrjuðu Framarar mun betur og komust í 15-20 er um 15 mínútur voru til leiksloka og var útlit fyrir að þeir myndu hafa öruggan sigur. Með dugnaði og bættum varnarleik sem og stórleik Arons Vals Leifssonar náðu okkar strákar að gera 4 mörk í röð og minnka muninn þar með í 19-20 er 8 mínútur voru til leiksloka. Síðustu mínúturnar voru æsispennandi, en því miður náðu okkar menn ekki að jafna þrátt fyrir að hafa átt góðan möguleika til þess.
Aron Valur átti frábæran leik og skoraði 10 mörk í öllum regnbogans litum, Andri Már lék vel á miðjunni eftir að hann var færður þangað og Sverrir Andrésson varði vel í markinu og þá sérstaklega á mikilvægum augnablikum. Vörnin var ágæt lengstum með þá Þór, Matthías og Sigurþór sem aðalmenn en þeir tveir fyrrnefndu áttu skelfilegan dag sem sóknarmenn.
Þetta lið leikur næst á miðvikudaginn kl 19.30 á Selfossi í bikarnum gegn Stjörnunni. Hvetjum við alla til að mæta og hjálpa strákunum áfram en hefð er fyrir því að lið Selfoss í 4. flokki nái langt í bikarnum.