Handbolti

Leikurinn í kvöld var alls ekki góður. Fyrri hálfleikur var ákaflega illa leikinn af okkar mönnum. Ráðalaus sóknarleikur og döpur vörn varð til þess að Stjarnan leiddi í hálfleik 10-12.

Það var allt annað lið sem mætti til leiks í þeim síðari og áttu Stjörnumenn ekki möguleika gegn fastri og góðri vörn Selfoss. Strákarnir breyttu stöðunni fljótlega í 18-13 sér í hag og lögðu þar með grunninn að sigrinum. Með bættri vörn komu hraðaupphlaup sem þeir Andri Már Sveinsson og Árni Steinn Steinþórsson nýttu sér vel og skoruðu þeir mörg mörk. Leiknum lauk 23-19.

Þeir Andri og Árni voru bestu menn liðsins, Árni með 10 mörk og Andri Már 7. Sverrir varði einnig vel í síðari hálfleik og þá má ekki gleyma varnarleik Matthíasar Halldórssonar, Þórs Davíðssonar og Orra Davíðssonar í síðari hálfleik.

Á laugardag leikur liðið hér heima gegn FH og B2 liðið strax á eftir gegn Fram. Leikirnir hefjast kl. 15 og 16. Mætið endilega til að berja leikmenn framtíðarinnar augum.