Handbolti

Selfoss 90 var alltaf skrefi á undan og komust meðal annars tvisvar í leiknum í 5 marka forystu, 9:4 og 20:15, en í bæði skiptin sýndi 89-liðið ótrúlegan karakter og kom til baka í báðum hálfleikjum. Staðan í hálfleik var 15:12 fyrir 90-liðið. Þegar 5 mín. voru til leiksloka var svo staðan jöfn en 90-liðið kláraði leikinn svo á síðustu mínútunni í leiknum.

Varnarleikurinn var svo sem í lagi en hefði getað verið betri en menn voru kannski full kurteisir við félagana á köflum. Markvarslan var fín hjá báðum liðum, Ástgeir varði 20 skot öðrum megin og Gústi og Binni 15 skot þar af 3 víti hinum megin. Leikkerfin gengu skiljanlega brösuglega þar sem bæði lið spila og æfa sömu leikkerfin og kunna lausnirnar gegn þeim. Í staðinn var spilaður mikið frjáls bolti sem gekk oft mjög vel og sýndu strákanir í báðum liðum að þeir geta vel spilað góðan frjálsan bolta líka.

Þá að liðunum. Í lið 89 vantaði Hörð Másson (Sjóla) sem var veikur en hann er með 12,5 mörk að meðaltali í leik í vetur í 3. flokki. Virtist það styrkja hina í liðinu og Eyþór Lárusson tók bara við af honum og setti 10 mörk úr 14 skotum (2 stoðsendingar) og spilaði sinn langbesta leik í vetur. Markaskorunin dreifðist síðan tiltölulega jafnt á aðra leikmenn: Sveinbjörn (2 stoðsendingar) og Árni Steinn settu 5 og Sæli, Kúldi (3 stoðsendingar) og Brynjar settu 3 hver. Það var þó einkennandi fyrir 89-liðið hversu jafnir þeir voru og allir skiluðu sínu í leiknum.

Í 90-liðið vantaði Matthías en hann var líka veikur. Guðmundur Árni var eins og Eyþór atkvæðamestur í sínu liði í markaskorun með 11 mörk úr 16 skotum. Næstir á eftir komu Örn Davíðs með 7 mörk úr 10 skotum og Einar með 4 mörk og 5 fiskuð víti. Markaskorun annarra var þannig: Bjarki Már með 4, Raggi með 3 (5 stoðsendingar) og Halli (6 stoðsendingar) og Andri Már með sitt hvort markið. Ólíkt 89 -iðinu þá voru of fáir að draga vagnin í þessum leik en það kom í hlut Gumma, Arnar og Einars að gera það. En Bjarki, Raggi og Halli hefðu mátt gera betur. 

Þess má geta að í hálfleik dró BT-músin út nokkra vinningshafa úr stúkunni sem fengu gjafir frá BT. Vonandi getum við gert þetta að föstum lið á leikjum 3 flokks í vetur.

90-liðið á eftir einn deildarleik fyrir jól og er hann næsta fimmtudag kl. 19:30 í Vallaskóla. Leikið verður við Víking sem er með gott lið og má búast við hörkuleik. Við hvetjum fólk til að koma aftur og horfa á strákana.