Handbolti

Eftir morgunmat kl. 06.30 var mætt kl. 07.45 í íþróttahúsið og byrjaði fyrsti leikurinn eins og fyrr segir kl. 08.30. Staðan í hálfleik 7 - 11 fyrir Selfoss en í seinni hálfleik tókum við öll völd á vellinum og unnum góðan sigur 18 - 27. Varnarleikurinn og markvarslan var vægast sagt frábær í þessum leik og lagði grunninn að sigrinum. Seinni leikurinn fór fram kl. 13.30 og var ekki laust við að menn væru aðeins lúnir en gerðu það sem til þurfti til að vinna. Staðan í hálfleik var ekki sett á skýrslu leiksins en lokatölur urðu 25 - 30 fyrir Selfoss. Aftur var varnarleikurinn mjög góður en aðeins í seinni hálfleik og þá var markvarslan aftur frábær. Sóknarleikurinn var hins vegar mun markvissari í seinni leiknum og var honum stjórnað af mikilli skynsemi, hvort sem það var Helgi, Kúldi eða Halli sem spluðu miðjuna. Varnarlega voru Atli Hjörvar, Kúldi, Steinar og Helgi að spila sína bestu leiki. Þá voru Baldur, Almar, Sjóli og Helgi að spila mjög góðan sóknarleik og voru þeir allir með góða skot- og sóknarnýtingu en gerðu fá mistök. Sérstaklega átti Helgi góða leiki og var sá leiðtogi sem hann á að vera í þessu liði. Því síður má gleyma að nefna Baldur sem átti frábæran leik í seinni viðureigninni og skoraði 9 mörk úr 10 skotum í vinstra horninu. Ekki má gleyma Birki sem átti hreint stórkostlega leiki. Hann varði 41 skot í leikjunum og var með 52% markvörslu en spilaði þó ekki allan leiktímann. Þess má geta að Birkir er með 42,5% markvörslu í 2. flokki það sem af er vetrar og hefur ekki átt nema 1 slakan leik í vetur af 7. Án efa einn efnilegasti markvörður landsins.

Á milli þessarra tveggja leikja spilaði Selfoss 89 í bikarnum og unnu strákarnir þann leik  26 - 29  eftir smá basl, en þeir voru með 6 marka forystu í kringum miðjan seinni hálfleik, en hleyptu baráttuglöðum ÍBV-urum inn í leikinn aftur og varð forskotið minnst 1 mark 23 -24. Þá tóku strákarnir aftur við sér eftir leikhlé og kláruðu leikinn. Í þeim leik voru Kúldi og Sjóli ekki á skýrslu enda að spila stór hlutverk í hinum leikjunum í 2. flokki. Þess í stað átti Eyþór algjöran stórleik og skoraði 11 mörk úr 15 skotum en hann var reyndar tekinn úr umferð allan síðari hálfleik. Steinar átti mjög góðan leik í sókn en var slakur í vörn. Binni Dóa skilaði góðum leik sem og Gústi markmaður sem varði 17 skot, þar af 2 víti. Sveinbjörn og Sæli voru mistækir og spiluðu vel og illa á víxl. Sveinbjörn tók við sér í lokin og tók öll völd inn á vellinum og átti heiðurinn af 5 af 6 síðustu mörkum Selfoss. Hann skoraði sjálfur 3 og gaf 2 línusendingar á Steinar sem skilaði þeim í netið af öryggi.  

Þar með eru öll Selfoss liðin komin í jólafrí og óska strákarnir öllum gleðilegra hátíða og farsældar á nýju ári sem vonandi verður jafn gæfuríkt og árið sem er að líða.

Áfram Selfoss