Handbolti

Þrátt fyrir að Gummi hafi verið í leikbanni og Einar hafi spilað veikur þá eiga strákarnir að vinna HK. En að eiga og gera er ekki það sama. Strákarnir mættu allt of öruggir með sig og héldu að þetta myndi gerast að sjálfu sér. Á fyrstu 15 mín. var greinilegt að einbeitingaskortur og kæruleysi var allsráðandi. HK lét ekki segja sér það tvisvar að nú væri lag og þeir börðust eins og ljón og lögðu 100% í leikinn og uppskáru því að lokum sanngjarnan sigur. Langbestir í liði HK voru markmaðurinn og skytturnar sitt hvoru megin. Í okkar liði spiluðu allir illa nema Raggi sem einn spilaði af eðlilegri getu og Halli sem var mjög góður síðustu 12 mín. en hafði varla verið með fram að því. Varnarleikur og markvarsla var í molum og því til staðfestingar má benda á að vörnin í heild sinni var aðeins með 22 brotin fríköst í leiknum en það er fríkastafjöldi sem 1-2 leikmenn ná venjulega í leik.


Það er vonandi að þeir læri af þessum leik að það þarf að mæta í alla leiki með 100% einbeitingu, trú á eigin leik og síðast en ekki síst með virðingu fyrir andstæðingnum. Bikarkeppninni er því lokið þetta árið hjá strákunum og verða þeir því að mæta á úrslitaleikinn sem áhorfendur í fyrsta skipti í 3 ár.