Handbolti

Selfoss sigraði í kvöld lið Hauka í keppni A liða 27-23. Leikurinn var hraður og harður og Haukamenn með frumkvæðið lengst um í leiknum. Selfoss komst í 2-0 en á 15 mínútum breyttu Haukar stöðunni 9-3 sér í hag. Skelfliegur leikkafli þar sem mikið af boltum tapaðist. Í hálfleik leiddu Haukar 11-9.

Haukar héldu forystunni lengst um í seinni hálfleik, alltaf 1-4 mörk. Okkar menn náðu loks að jafna í stöðunni 18-18 og litu þeir ekki um öxl eftir það. Selfoss komst í 23-19 og virtist sem Haukastrákar væru sprungnir. Lokatölur eins og fyrr segir 27-23 og liðið því komið í undanúrslit þar sem það mætir annað hvort FH eða Þór. Frábær árangur hjá þessum drengjum.

Bestur í liði Selfoss var Andri Már Sveinsson sem skapaði mikinn usla í vörn Hauka með hraða sínum. Guðmundur Þórarinsson lék einnig frábærlega og dreifði spilinu ákaflega vel. Þá lék Sigurþór Þórsson sinn langbesta leik í langan tíma og einnig lék Matthías vel í seinni hálfleik. Þór Davíðsson vaknaði til lífsins í seinni hálfleik og skoraði nokkur mikilvæg mörk. Árni Steinn Steinþórsson hefur oft skorað meira en í leiknum en engu að síður lék hann vel og skoraði nokkur falleg mörk. Sverrir Andrésson hefur oft varið betur en hann varði á ákaflega mikilvægum augnablikum og samtals 16 skot. Aron Valur Leifsson lék minna en oft áður en skoraði hann engu að síður sennilega tvö mikilvægustu mörk leiksins. Birgir Harðarson lék sama og ekkert, enda erfitt að koma honum inn á er mennirnir í hans stöðu leika vel eins og í kvöld.

Á morgun leikur svo B2 við ÍR í Þorlákshöfn og hefst leikurinn kl 20.00.