Handbolti

Það sem varð Selfossliðinu að falli í vetur voru leikir þeirra við ungmennalið Hauka sem þeir töpuðu 2 fyrir og reynsluleysi í lokakafla jafnra leikja. Alls 5 jafnir leikir töpuðust í vetur á lokamínútum vegna reynsluleysis strákana. Á næsta ári verða þeir að sjáfsögðu reynslunni ríkari og þá klára þeir vonandi þessa stöðu þegar hún kemur upp aftur.

Að lokum má ekki gleyma því að liðið náði aldrei að stilla upp sínu besta liði í vetur og það vantaði eldri leikmenn liðsins á löngum köflum í vetur vegna meiðsla. Mikalonis, Arnar og Hörður misstu allir af leikjum á víxl í vetur. Fyrir vikið fengu ungu strákarnir skyndilegan sundsprett í djúpu lauginni. Þá missti Atli af mörgum leikjum sem gerði það að verkum að miðjumenn og hornamenn þurftu allt of oft að spila vinstri skyttuna í vetur.

Í heild þá stóðu strákarnir sig frábærlega á sínu fyrsta ári í meistaraflokki og fengu mikilvæga reynslu fyrir framhaldið. Það er ljóst að liðinu hefur tekist að búa til sterkan heimavöll en árangur liðsins var frábær en enginn andstæðingur getur haldið því fram að auðvelt hafi verið að koma hingað í vetur. Liðið tapaði bara 3 á heimavelli í vetur og þá alltaf naumt, með 1 og 2 fyrir Aftureldingu og með 4 fyrir IBV.

Við þökkum öllum sem hjálpuðu til í vetur með því að styrkja liðið og sérstaklega áhorfendum fyrir að koma á leikina. Það varð fjölgun á áhorfendum á leikjum meistaraflokks í vetur á sama tíma og önnur félög kvarta undan fækkun. Það er enn ein rós í hnappagatið á starfi handknattleiksdeildarinnar í vetur.