Handbolti

Um helgina fór fram úrslitahelgi 4. flokks karla í handbolta. Selfoss átti þar tvö lið, eitt í keppni A liða og annað í keppni B liða. A liðinu hafði gengið vel á tímabilinu fram að úrslitum og lauk deildarkeppninni með því að ná í 3. sætið. B liðið varð aftur á móti deildarmeistari eftir frábæra Akureyrarferð fyrr í þessum mánuði.

B liðið hóf leik á laugardagsmorgni og atti kappi við Hauka úr Hafnafirði. Selfoss hafði mikla yfirburði í leiknum og komst í 10-1. Haukar náðu aðeins að klóra í bakkann og í hálfleik stóðu leikar 13-5. Í síðari hálfleik komst Selfoss í 19-8 og ljóst að Haukar áttu ekki möguleika í firnasterka vörn og góða markvörslu okkar manna. Þá tóku annars hörmulegir dómarar leiksins öll völd á vellinum og voru Selfyssingar a.m.k. einum færri það sem eftir var hálfleiksins. Guðbjörn Tryggvason fékk rautt spjald er 10 mínútur voru til leiksloka og skilur enginn fyrir hvað það var! Selfoss hafði þó sigur 23-18, þetta var mjög góður sigur þar sem strákarnir mætti miklu mótlæti í leiknum.

Síðar á laugardag lék svo A liðið gegn FH í undanúrslitum. Okkar menn mættu allt of stressaðir til leiks og er óhætt að segja að þeir hafi aldrei glætu í leiknum. Eftir fimm mínútna leik var staðan orðin 5-1 og Selfyssingar búnir að klikka á fimm dauðafærum. FH valtaði yfir okkar lið sem hefur sennilega aldrei leikið eins illa og í þessum leik. Staðan í hálfleik var 14-7 og lokatölur 29-18.

Í gær lék svo B liðið við sterkt lið KA um Íslandsmeistaratitilinn. KA hafði fyrr á leitíðinni unnið Selfoss tvisvar en tapað einu sinni. Selfyssingar voru því staðráðnir að láta þá ekki vinna sig í þriðja sinn og mættu því ákveðnir til leiks. Jafnt var á öllum tölum í 6-6 en þá skoraði KA þrjú mörk í röð. Næstu fimm mörk leiksins voru þó Selfyssinga og staðan því 11-9 fyrir okkar drengi. Í hálfleik stóðu leikar 14-11.

Í síðari hálfleik komust KA menn ekki nær en fjögur mörk, Selfyssingar höfðu undirtökin allan tímann. Lokatölur 25-21 í frábærum leik. Orri Þrastarson lék frábærlega í leiknum sem og Örn Davíðsson sem stjórnaði leik liðsins mjög vel. Guðbjörn Tryggvason gerði marga góða hluti í leiknum og Trausti Eiríksson lék góða vörn og nýtti færi sín vel. Daníel Freyr Jónsson átti góðan leik á línunni en hefði mátt spila betri vörn. Kamil Jónsson lék einnig mjög vel. Þá má ekki gleyma þætti Helga Hlynssonar í markinu, en hann varði 22 skot þar af tvö vítaköst.

B lið Selfoss því Íslandsmeistari 2007!!!

A liðið mætti Valsmönnum í leik um þriðja sætið í gær. Valsmenn eru vel þjálfaðir og hafa á klókum leikmönnum á að skipa. Leikurinn var í jafnræði allan fyrri hálfleik en Selfoss hafði yfir 12-11. Í síðari hálfleik skildu leiðir og Selfoss tóku 4-5 marka forystu. Sá munur hélst til leiksloka og lokatölur 27-21. Selfoss því í 3. sætið í keppni A liða.

Sverrir Andrésson markmaður varði mjög vel í leiknum eftir hörmulegan leik gegn FH. Hornamennirnir Árni Steinn Steinþórsson og Andri Már Sveinsson átti stórleik og skoruðu mörg falleg mörk. Þór Davíðsson lék vel, sérstaklega í línunni, Matthías Halldórsson lék mjög góða vörn og skoraði nokkur falleg mörk og Sigurþór lék að venju sterka vörn. Aron Valur Leifsson átti einnig góðan leik sem og Guðmundur Þórarinsson sem stjórnaði sókninni glæsilega, ekki slæm frammistaða hjá dreng á yngra ári.