Handbolti

Íslandsmeistaratitill í 6. flokki

6. flokkur karla fór nú um helgina í góða ferð til Vestmannaeyja. 32 strákar ásamt fjölda foreldra fór um hádegi föstudags með Herjólfi og komið var heim um kvöldmat á sunnudegi. Ferðin heppnaðist í alla staði vel og var þessi ferð mjög góð bæði félagslega sem og handboltalega. Strákunum gekk almennt mjög vel, miklar framfarir sáust og gullfalleg tilþrif sáust í hverjum leik.

A liðið hafnaði í öðru sæti á mótinu eftir að hafa tapað í úrslitum á sorglegan hátt fyrir sterku Stjörnuliði. Strákarnir höfðu fram að því verið að spila geysilega vel og unnið alla sína leika nokkuð örugglega ef frá er skilinn fyrsti leikurinn við FH þar sem menn voru ekki komnir á tærnar. Góður varnarleikur þar sem baráttan og liðsheildin var í fyrirrúmi ásamt frábærum sóknarleik með þá Gísla og Janus Daða fremsta í flokki ásamt stórleikjum Árna Everts var það sem skilaði strákunum svona langt. Gaman var að sjá hvað allir voru að leggja sig fram og allir að skila sínum hlutverkum vel. Samanlagt urðu strákarnir svo í 3. sæti til Íslandsmeistara og því fóru þeir heim með tvenn verðlaun en fyrr í vetur urðu þeir deildarmeistarar

B liðið spilaði 4 leiki, tapaði 3 og gerði eitt jafntefli. Miklar framfarir voru á leik strákanna og þeir stóðu sig mjög vel. Klaufaleg mistök urðu til þess að þeir unnu ekki 2 leiki og komust í milliriðla en þeir læra af reynslunni. Vörnin hjá þeim var með hreinum ágætum og baráttan sem oft hefur vantað var til staðar. Símon var mjög traustur í markinu en heilt yfir er erfitt að taka einhverja einstaka út því allir gerðu sem þeir gátu og eiga hrós skilið.

C liðið fór alla leið í úrslit án þess lenda í nokkrum vandræðum. Þar mættu þeir hins vegar eins og oft áður sterku liði FH. Leikurinn var stórskemmtilegur og mikil barátta beggja liða var aðdáunarverð. Hins vegar bitnaði sterkur varnarleikur á markaskori og FH sigraði að lokum 3-2 eftir að staðan hafði verið 1-1 í hálfleik. Klaufagangur og hrein óheppni varð til þess að þessi leikur tapaðist ásamt stórleik markmanns FH. Bæði víti liðsins fóru forgörðum sem og fjöldi dauðafæra. Þessi árangur verður þó að teljast mjög góður en með því að ná öðru sæti á mótinu tryggði liði sér Íslandsmeistaratitilinn og því fóru þeir eins og A liðið heim með tvenn verðlaun. Vörn liðsins var eins og áður í vetur stórkostleg sem og markvarslan. Í sóknarleiknum skiptust menn á um að skora mörkin og allir tóku virkan þátt sem er mjög jákvætt. Þessir strákar sem allir eru á yngra ári eiga eftir að vera firnasterkir í þessum flokki á næsta ári.

C2 liðið spilaði 4 leiki en laut því miður í gras í þeim öllum, þó aldrei með miklum mun og voru óheppnir að ná ekki í nokkur stig. Þessir strákar stóðu sig mjög vel en flestir þeirra eru á yngra ári og eru nýlega byrjaðir að æfa. Þeir lögðu sig fram, spiluðu fína vörn og virtust skemmta sér mjög vel. Þrátt fyrir að þeir hafi ekki náð í stig þurfa þeir ekki að örvænta því þeir eiga framtíðina  fyrir sér.

Að lokum ber að þakka þeim fjölmörgu sem komu að þessari ferð sem og ÍBV fyrir frábæra umgjörð og mótsstjórn.Meðal annars var ljósasjóv fyrir alla úrslitaleikina og leikmenn kynntir inn á völlinn sem er skemmtileg reynsla fyrir þessa stráka. Nú er bara að halda áfram að æfa af krafti og koma enn sterkari til leiks í mótum næsta vetrar.