Handbolti

Selfoss leikur sinn fyrsta leik í 1.deild íslandsmótsins á keppnistímabili heima gegn Gróttu n.k. fimmtudag.
Af því tilefni lagði heimsíðan nokkra spurningar fyrir Sebastian þjálfara liðsins. Sebastian er að hefja sitt fimmta tímabil sem þjálfari meistaraflokks en hann er einnig aðalþjálfari handbolta-akademíu Fsu þar sem leikmenn unglingaflokks og 2. flokks eru, en þeir eru líka margir í meistaraflokkshópnum.

Hvernig leggst leikurinn á fimmdaginn í þig ?
Leikurinn leggst bara vel í mig enda í fyrsta skipti í einhver 10 ár sem Selfoss byrjar mótið á heimavelli. Við spiluðum 3 hörkuleiki í fyrra á móti Gróttu og ég á ekki von á neinu öðru en að svo verði líka núna.

Hvernig lýst þér á deildina ? hvernig eru hin liðin ?
Mér líst vel á deildina. Mér sýnist að hún verði talsvert sterkari en í fyrra. Mörg lið búin að bæta við sig leikmönnum og auka breiddina mikið. Mér skilst að ÍR og FH eigi að vera með langbestu liðin. Ég hef lagt langmesta áherslu á mitt lið og því fylgst sáralítið með hinum liðunum en ég geri ráð fyrir því að þau komi öll tilbúin í slaginn.

Hvernig hefur undirbúningurinn gegnið í sumar og haust ?
Undirbúningstímabilið hefur gengið ágætlega. Menn hafa æft vel og lagt talsvert á sig. Við spiluðum á Ragnarsmótinu og fórum svo í frábæra ferð til Danmerkur þar sem við spiluðum 5 leiki. Það hefur þó verið óþarflega langt enda stóð fyrst til að við myndum byrja að spila einum 3 vikum fyrr en raunin er. Við hefðum t.a.m. farið amk viku síðar út til Danmerkur ef við hefðum vitað að við myndum hefja leik í október. Það eina sem skyggir á undirbúningstímabilið er að Helgi Héðinsson meiddist illa í Danmerkurferðinni og verður frá a.m.k. fram að áramótum.

Ertu sáttur við núverandi keppnisfyrirkomulag ?
Já mjög svo. Það sýnir sig núna í ár að leikmenn úr félögum í efri deild eru að skipta niður til þess að fá að spila meira auk þess sem að leikmenn sem annars myndu hætta hafa hér vettvang til að spila á. Það eina sem vantar til þess að þetta sé fullkomið er að þetta séu tvær 10 liða deildir.

Hvernig sérðu fyrir þér líklegt byrjunarlið ?
Það er ómögulegt að segja. Sem betur fer er mjög mikil samkeppni um stöður í byrjunarliðinu og raunar líka inn í 14 manna hópinn. Yngri leikmennirnir eru það góðir að þeir veita þeim sem "eiga" að vera í liðinu mikla pressu sem mér finnst mjög jákvætt. Eins og staðan er í dag þá er enginn öruggur með sætið sitt. Ég mun því ekki ákveða byrjunarliðið fyrr en á miðvikudag.

Hver eru markmið liðsins fyrir keppnistímabilið ?
Þetta er frekar snúin spurning vegna þess að við förum auðvitað í alla leiki til þess að vinna þá. Ég er hins vegar ekki viss um að við eigum að fara upp strax. Mér finnst ungu strákarnir þurfa 1 ár í viðbót til þess að þroskast og bæta á sig nokkrum kílóum til þess að taka tvö síðustu skrefin. Ef við förum upp áður en þeir eru tilbúnir þá erum við að taka mikla áhættu því að bakslagið er stórt ef þeir fara niður með hraði aftur. Þar sem við ætlum ekki að kaupa fjölda leikmanna til þess að spila í úrvalsdeild þá verða þeir að hafa getu til þess að vera eitt af 6 bestu liðum landsins til þess að eiga erindi upp og það er talsverð áskorun.

Þannig að svarið er að við stefnum eins langt og við getum í vetur og ef að þeir sýna það að þeir eru tilbúnir þá er það ekkert verra.