Áhugavert handbolti

Handboltaakademía

Handboltaakademían á Selfossi var stofnuð árið 2006 og frá þeim tíma hafa alls 189 krakkar reynt fyrir sér í þessu námi. Frá stofnun hafa alls 50 iðkendur klárað öll þrú árin og útskrifast úr þessu námi en hinir 139 verið ýmist í eitt eða tvö ár af þeim þremur sem þarf til að klára námið.

Í meistaraflokkum félagsins í dag eru fjölmargir leikmenn sem hafa farið í gegnum akademíustarfið. Í dag eru 36 leikmenn í æfingahópum meistarflokks karla og kvenna sem hafa verið í handknattleiksakademíu FSu. Í dag höfum við átt sjö leikmenn sem hafa komist í atvinnumennsku úr akademíunni og tólf leikmenn sem hafa verið valdir í æfingahóp hjá A-landsliði Íslands. Þar af eru átta þeirra búnir að spila leik.

Á þeim tíma sem akademían hefur verið starfandi hafa yfir 60 leikmenn verið valdir til æfinga hjá þeim landsliðum sem eru á framhaldsskólaaldri. Úr þessum hópi leikmanna eru yfir 35 leikmenn sem hafa náð því að spila opinberan leik fyrir Ísland. Það er því með mikilli ánægju og stolti sem við vonumst til þess að halda áfram að stuðla að mótun framtíðarleikmanna fyrir íslenskan handknattleik um ókomin ár.

Í akademíunni undirrita allir iðkendur samning þar sem þeir skuldbinda sig til þess að fylgja ákveðnum reglum. Þar er komið inn á ýmsa þætti eins og að sinna náminu, mæta á æfingar og verkefni sem tengd eru markmiðum og ýmsu í þá áttina. Mikilvægasti þáttur samningsins er forvarnagildi hans, en þeir krakkar sem eru í akademíu og undirrita samninginn skuldbinda sig til þess að neyta ekki neinna vímuefna, tóbaks eða áfengis á samningstímanum.

Einnig býðst krökkunum að skrá sig aukalega í akademíumat. Það er mötuneyti á vegum akademíunnar þar sem eldaður er góður hádegismatur sem hæfir íþróttafólki fjórum sinnum í viku og mælum við eindregið með því að krakkarnir nýti sér það, enda er næring einn mikilvægasti grunnþáttur íþróttafólks sem vill ná árangri.

Hvað þýðir að vera hluti af akademíu Umf. Selfoss?
Að vera hluti af akademíu er að vera hluti af heild sem öll stefnir að sameiginlegum markmiðum. Það að vera í akademíu þýðir að þú þarft að læra á sjálfan sig og læra á aðra ásamt þínu nánasta umhverfi. Að umgangast þessa hluti og annað fólk í þínu umhverfi af skilningi, metnaði, skynsemi og ábyrgð. Þú þarft að læra að vera hluti af einhverju stærra og finna þinn sess í því sem þú ert að taka þátt í og gera eins mikið úr því og þú getur.

Hvað fæ ég út úr því að vera í akademíu Umf. Selfoss?
Ef þú tekur fullan þátt í því sem er verið að setja upp fyrir þig þá öðlast þú betri skilning á sjálfum þér sem einstaklingi og íþróttamanni. Þú lærir að nálgast þín verkefni af þolinmæði, ábyrgð og metnaði og finnur vonandi þína hillu í því sem þú ert að taka þér fyrir hendur og bætir þig í kjölfarið.

Framtíðin
Vonandi verður framtíðin áfram jafn björt og frjó og hefur verið hingað til. Það er von okkar að skemmtilegir og áhugasamir krakkar haldi áfram að sækja í okkar prógram og við höldum áfram að standa undir þeim væntingum sem þessir krakkar gera til okkar.

Þjálfarar

Patrekur Jóhannesson
Yfirþjálfari
Örn Þrastarson
Aðstoðarþjálfari

Rúnar Hjálmarsson
styrktarþjálfari

Menntun:
B.S. í íþróttafræði frá HR 2008
Master coach 2012 – EHF
Master coach 2016 – EHF
M.Sc. íþróttaþjálfun og vísindi

Ferill:
Stjarnan
K.A.
Tusem Essen
Elgoria Bidasoa
GWD Minden
243 A-landsleikir fyrir Ísland

Menntun og reynsla:
Íþróttafræðinemi í H.Í. (vor ’18)
Þjálfaragráða HSÍ stig 1 (a,b & c),
stig 2 (a,b og c) og 3 a.
Þjálfað handbolta í 10 ár
Menntun og reynsla:
1.stig hjá ÍSÍ og Youth
Coach réttindi hjá FRÍ
Þjálfað frjálsar í 9 ár


Fjöldi iðkenda
Haust 2017: 39 (24 strákar og 15 stelpur)

Æfingaaðstaða
Íþróttahús Vallaskóla – Tækniæfingar
Íþróttahús Iðu (Íþróttasalur) – Tækniæfingar
Íþróttahús Iðu (Þreksalur) – Styrktaræfingar

Fjöldi eininga
Valáfangi. 6 annir. Alls 30 einingar

 

Umsagnir frá iðkendum

Hrafnhildur Hanna Þrastardóttir

Útskrifaðist úr akademíunni 2014 og spilar í dag með Selfoss, hún á að baki 22 A-landsliðsleiki:
„Handboltaakademían hjálpar manni mikið til að bæta sig sem leikmaður. Tækniæfingarnar eru frábærar því að þar er unnið með það sem hver og einn þarf að bæta. Við höfum tíma til að vinna í smáatriðunum í t.d. skotum og fintum. Styrktaræfingarnar hjálpa okkur einnig mikið. Akademían er því tilvalinn staður til að bæta við sig nýjum hlutum í íþróttinni og verða þar af leiðandi betri leikmaður. Svo er auðvitað gaman að brjóta skóladaginn upp með því að fara á æfingu.”

Ragnar Jóhannsson

Útskrifaðist úr akademíunni 2009 og spilar í dag sem atvinnumaður hjá Huttenberg í þýsku Bundesligunni:
„Akademían gerði mig að betri handboltamanni. Þar lærði ég mikilvægi þess að leggja stund á æfingar, lyftingar og ýmsar tækniæfingar sem alltof fáir pæla í. Einnig hafði hún forvarnarlegt gildi fyrir mig. Akademían er staður fyrir þá sem vilja bæta sig og ná lengra í handbolta.”

Janus Daði Smárason

Var í akademíunni árið 2012.  Þaðan fór hann til Danmerkur og síðan í Hauka, áður en hann fór aftur út til Danmerkur, en í dag er hann atvinnumaður í meistaraliði Aalborg og fastamaður í A-landsliði Íslands.:
„Akademían hjálpaði mér og gaf mér tíma til að æfa tæknina mína aukalega. Einnig lagði hún grunninn að styrktarþjálfun minni.”

Elvar Örn Jónsson

Útskrifaðist úr akademíunni árið 2015 og er í dag lykilleikmaður í Olísdeildarliði Selfoss og hefur verið valinn í úrtak fyrir A-landslið karla:

„Akademían hefur hjálpað mér gríðarlega mikið, skottækni og fintur sérstaklega. Ég hef styrkst mikið í akademíunni útaf lyftingunum.  Frábært skipulag og þú færð betri skilning á smáatriðum sem skipta svo miklu máli. Hefur einnig hjálpað mér andlega og í markmiðasetningu.”

Ómar Ingi Magnússon

Var á handknattleiksakademíunni árið 2014, þaðan fór hann í úrvalsdeildarlið Vals í smá tíma og er í dag atvinnumaður í Aarhus í Danmörku og fastamaður í A-landsliði Íslands:

„Það sem ég lærði í handboltaakademíunni hefur nýst mér ótrúlega vel, tæknin og æfingarnar sem ég lærði nýtast mér enn í dag og er stór hluti af mínum leik. Þú færð dýrmæta þekkingu frá frábærum þjálfurum sem hjálpa þér að bæta þig tæknilega og líkamlega, einnig sýnir það þér hvernig hugarfar þú þarft að vera með til þess að geta iðkað íþróttina á hæsta leveli.”

Perla Ruth Albertsdóttir

Var í akademíunni 2014 -15. Hún byrjaði í handbolta í fyrsta skipti haustið 2014 og steig sín fyrstu skref í akademíunni. Í dag er hún lykilleikmaður í Olísdeildarliði Selfoss og hefur verið valin í A-landslið Íslands:

„Ég byrjaði í handbolta í fyrsta skipti þegar ég var 17 ára og steig mín fyrstu skref í akademíunni. Akademían var ein af ástæðunum fyrir því hversu hratt ég náði tökum á handbolta og bætti mig gríðarlega hratt. Þar er líka frábær styrktarþjálfun sem ég lærði mikið af. Einnig var mikið unnið í andlega þættinum í gegnum verkefni og markmiðasetningar og ég lærði hratt hverslags hugarfar maður þarf að hafa til þess að ná árangri í íþróttum og lífinu. Einnig voru margir áhugaverðir fyrirlestrar og góð námskeið. Því miður byrjaði ég of seint í handbolta til að ná að útskrifast úr akademíunni áður en ég kláraði skólann, en ennþá reyni ég alltaf þegar tækifæri gefst að fá að kíkja á eina og eina akademíuæfingu og rifja upp, en það er frábær vettvangur fyrir tækniþjálfun og grunnþjálfun sem oft er ekki tími fyrir á hefðbundnum liðsæfingum á kvöldin. Ég mæli með akademíunni fyrir alla”